Yuzanan company gaw jak kaba hte htu galau ai gan jahkring nga

Yazana company kawn May shata htum maga kaw nna kalang bai Mung shawa ni galaw sha nga ai lamu ga hkauna ni hpe la ba ka-up zing wa ai hpe Mung shawa ni bai tsun ninghkap ai majaw dai lamu ga ni hkan Mung shawa ni mi na zawn bai galaw sha nga sai re hpe chye lu ai.

Yuzana company gaw zing madu da ai lamu ga ni hte seng nna hpa n lu hparan shi nga yang Mung shawa ni galaw sha dingngam lamu ga ni hpe Jak kaba ni lang nna kalang bai htim shang wa ai lam ni majaw company ni hte Mung shawa lapran manghkang ni byin lai wa sai re.

Company maga kawn ndai lamu ga hte seng nna Mung mare masha marai 4 amu jep joi hparan ai lam n lu galaw shi yang n-gun la ba hte htim shang wa ai gaw ntara ai lam re nga nna  Mung shawa ni myit hkrum let jawm tsun ninghkap ai majaw ndai laman hta company maga kawn mung mare masha ni galaw sha ai shara ni de  gawan hkawm ai lam n nga sai raitim company maga kawn kalang bai shamu shamawt wa yang manghkang grau sawng na masa nga ai lam buga masha langai tsun ai.

Company kabai tawn da ai lamu ga kaw Mung shawa ni bai wa galaw sha ai majaw company maga kawn zing da ai lamu ga kaw ahkang n nga galaw sha ai ngu Salang Maran Seng Li, Salang Maran Brang Seng, Salang Wawhkyung Zau Tawng hte Jan Hpau Ke Htang ni hpe Hpakant Tara Rung kaw amu shawk shawn da ai hte maren tara rung lung ai mung 42 lang rai sai re hpe chye lu ai.

Leave a Reply

Your email address will not be published. Required fields are marked *