IDP ni tinang mare buga de bai wa nga na lam hta Japan Asuya garum ningtum jaw ya na

Myen Mung na Japan Sumtsan Salang Ichiro Maruyama  hte mung masa Salang Naoya Kishi gaw Kachin pawnghpawm mung masa party KSPP ningbaw ni hte hkrum zup bawngban ai hta IDP Mung shawa ni tinang mare buga de bai wa shanu nga lu na matu, Jinghpaw Mung kata simsa wa na matu hte bawngring rawt jat lam hte seng ai lawnglam ni hte seng nna hkrum bawngban ai lam na chye lu ai.

“Bawngban jahkrup ai hta hpyen yen ni hpe tinang mare buga de bai wa shangun ai lam hte seng nna Japan Asuya kawn garum ningtum jaw ya mai na kun? Party ni a ningmu hpe tsun dan rit nga nna tsun wa ai. Ya aten IDP ni wa na lam hpe seng ang ai ni bawngban jahkrup nna ngang kang ai hku galaw sa wa na re majaw garum ningtum lam ni grai ra nga ai lam tsun dan ai hte maren Japan Asuya kaw na mung garum jaw na lam hkam la da sai” nga nna KSPP Ningbaw Dr. Manam Tu Ja tsun ai.

Simsa lam hte seng nna mung ya aten Jinghpaw Mung hta IDP ni grai law nga ai rai nna majan bai kahtap byin wa ai rai yang grau nna mayak lam ni law wa na re. Dai majaw Myen Asuya, Myen Hpyen Dap hte laknak lang rawt malan hpung ni a lapran shada chye na hkat ai hte simsa lam gawgap sa wa yang grau kaja na re ngu mu mada ai, Japan Asuya hku nna Myen Mung, Jinghpaw Mung simsa lam hte seng nna dang lu ai made hpaji jaw garum ya na hpe myit mada ai lam matut tsun ai.

KSPP Sign Board sharawt akyu hpyi lamang hpe June 22 ya jahpawt hkying 8:00AM aten hta galaw na rai nna, KSPP hku nna mare nhtawn shagu de masha garan nna fund tam ai lam hte Committee, rung ni hpe mung hpaw sa wa na re hpe chye lu ai. Kachin pawnghpawm mung masa party n-nan hkalum poi kaba hpe gaw Junly 20 ya shani Manau wang majoi gawknu kaw galaw na matu myit yaw sing da ai re hpe mung chye lu ai.

Photo; KSPP

Leave a Reply

Your email address will not be published. Required fields are marked *