Hpakant Lungseng n hkun dingsa gyi ru wa ai majaw masha marai 2 asak si sum

Hpakant Maw Wan, Maw Mau Bum mare makau na Jade Land Company hte Naka Ku Kawng Company ni a Lungseng n hkun dingsa  kaw June 21 ya shani n gam gyi ru wa nna lung seng tam masha marai 2 asak si sum mat nna marai 2 hkala sawng ai lam na chye lu ai.

Hkala sawng mat ai 2 ya aten Hpakant tsi rung kaw tsi tsi hkamla nga ai rai nna asak si sum mat ai yan a moi mang hpe Hpakant garum gahtau hpung ni kawn lit la tam nga ai lam na chye lu ai. Hpakant ginra hta company ni galaw sha ngut chyalu nhkun dingsa ni lanam aten ladaw marang loi li htu ai hte lamu ga ni gyi ru wa nna Lungseng tam masha ni si hkala manghkang ni shaning shagu byin hkrum nga ai lam buga masha ni tsun ai.

Company ni kabai tawn da ai n hkun dingsa hkan tinang dang di dang dep ai hku galaw sha nga ai ni gaw law malawng ginra madu Jau man masha ni grau law ai rai nna Lanam shang wa ai hte marang kaji kajaw htu re yang n gam ni gyi ru wa nna si hkala ai lam ni ginra masha ni law malawng byin hkrum ai re hpe chye lu ai.

Lanam aten ladaw hta n gam gyi ru ai hka kaba ai lam amyu myu byin hkrum ai re majaw Asuya kawn mung dai ni lanam aten ladaw hta Lungseng company ni yawng bungli hkring na matu tsun ndau da ai lam ni nga ai raitim shaning shagu ngu na daram company nkau ni gaw bungli hkring ai lam n nga, dingyang galaw sha ai company ni mung nga ai re. Tara n hkan sa ai company ni hpe Asuya kawn atsawm jep joi ahkyak la na hpe ginra masha ni ra sharawng nga ma ai re.

Photo; Crd

Leave a Reply

Your email address will not be published. Required fields are marked *