Ka-ni nanghpam hpaga hpung ni a shara htim zing

KIA Masat (8) Dap Ba, Masat (41) Dap Nawng Dap Dung ginra Nam Ma post hte Mu Nyin lapran Nsen Kahtawng mare dingsa kaw Dap jung shara la nna Ka-ni Nanghpam dut shabra nga ai Salang Tun Tun a Ka-ni  Nanghpam hpaga dabang hpe June 15 ya shani Masat (41) Dap Nawng Dap Dung ni Pat Jasan bungli shang nna sa htim zing kau ya sai lam na chye lu ai.

Ka -ni Nanghpam hpaga madu Salang Tun Tun gaw hprawng lawt mat ai raitim shi madu jan hte bungli masha La Salang langai hte hpawn sakse arung arai Ka-ni hpraw Sa bya kawk 120, Yama htuk kaba 2 jan, Myen gumhpraw sen 200 hte sinat laknak machyu pala law law hpe zing la lu ai lam shawnglam shi sawk ni shiga jaw ai kaw na chye lu ai.

Salang Tun Tun gaw zing la hkrum sai shi a Ka-ni Nanghpam dabang hta shara bai la lu hkra ya hte sha htawng kaw na pru wa ai shi a kanau Ahsilay hte Wunpawng amyu sha hpawmi lahkawng hte matut bungli shang nga ai lam sagawn chye lu ai.

Salang Tun Tun gaw Ka-ni Nanghpam dut sha ai majaw lai wa sai 2017 ning hta Namma mare masha ni mare kaw nna gawt shapraw kau hkrum ai wa re lam mying n tsun mayu ai dai mare na Salang langai shana wa ai.

Salang Tun Tun woi awn ai Ka-ni Nanghpam hpaga hpung gaw M16 Sniper sinat hte kaga hpyen laknak ni jai lang ai hpe maram yu yang wuhpung wuhpawng law law hte matut mahkai nna hpaw da ai Nanghpam hpaga hpung rai na masa nga ai majaw Mung shawa yawng hte lata gindun nna gasat shamyit kau ra na re nga nna lit nga ai ni tsun ai hpe mung matut chye lu ai.

Leave a Reply

Your email address will not be published. Required fields are marked *