Myitmyit Sinli Ga KIA ginra ni hta gasat gala majan byin

Mungmyit Sinli Ga ginra kata nga ai KIA Hpyen Dap ni de Myen Hpyen Dap ni shamu shamawt shang wa ai majaw June (23) ya shani KIA Masat (4), Masat (6) Dap Ba, Masat (10) Dap Ba ginra ni hta gasat gala byin ai lam na chye lu ai.

Gasat gala byin ai shara ni gaw KIA Masat (4) Dap Ba, Masat (8) Dap Dung ginra Nawng Pa hte Loi Gaw lapran kaw Myen Hpyen Dap ni shamu shamawt shang wa ai majaw shani hkying 12:30Pm aten daram kaw nna gasat gala byin ai re, KIA Masat (6) Dap Ba, Masat (36) Dap Dung ginra ni a shawnglam post maga de mung jahpawt hkying 8:30Am daram kaw nna Myen Hpyen Dap ni htu shadut shang wa ai majaw KIA hpyen hpung ni hkap shaingla gasat dat ai kawn gasat gala byin ai rai nna KIA Masat (10) Dap Ba, Masat (17) Dap Dung ginra Loi Dau Bum na KIA hpyen hpung ni nga ai de Myen Hpyen Dap ni htim shang wa ai kawn gasat gala byin ai lam na chye lu ai.

Myen Hpyen Dap kawn Sam Mung, Jinghpaw Mung ginra (5) hta hpyen shamu shamawt lam jahkring da na matu June (30) ya shani du hkra nhtoi bai masat jat da ai raitim Lahta Sam Mung ginra, Mungmyit Sinli Ga ginra ni hta gaw Myen Hpyen Dap ni dingyang naw shamu shamawt hkawm ai majaw gasat poi ni jahkring hkring naw byin nga ai hpe na chye lu ai. June (16) ya shani hta mung Kuthkai ginwang Maru Hpaga mare de Myen Hpyen Dap ni du shang wa ai majaw TNLA hpyen hpung ni hte gasat poi byin ai kawn Maru Hpaga, Namhwi, Nawng San Chawng Hkung mare na Mung masha marai (200) jan Maw Han mare de ya aten du hkra hprawng yen ra mat ai re hpe na chye lu ai. Myen Hpyen Dap kawn Lanam ladaw laman Lahta Sam Mung hte Mungmyit Sinla Ga ginra ni de hpyen shamu shamawt ai lam grau nna law wa ai hpe mu mada majaw ginra Mung mare masha ni majan laja lana byin wa na hpe hkrit tsang nga ma re hpe ginra shi sawk ni shana wa ai kaw na chye lu ai.

Leave a Reply

Your email address will not be published. Required fields are marked *