Grak lagra n re ai hku Pat (ပယင္း) htu sha ai lam galaw lu na matu lamu ga Eka 7000 garan ya

Danai ginra hta grak lagra n re sha Pat (ပယင္း) htu shaw na matu lamu ga Eka 7000 daram hpe Jinghpaw Mung Asuya Nhprang Sut Rai Magam Dap kawn shawng nnan lang shara jahkrat masat ya ai re lam chye lu ai.

Jinghpaw Mung Asuya kawn Pat (ပယင္း) hpe shawng nnan lang jum tek ahkang jaw ai re hte kaga nhprang sut rai ni hpe galaw ahkang matut jaw na lam ni nga ai. Jinghpaw Mung hta nga ai nhprang sut rai ni hpe ladat hte hkrak htu shaw na re lam Mungdaw Asuya lit nga ai salang langai tsun ai.

“Ya galaw ahkang jaw ai shara ni gaw Danai ginra na ႏြယ္ဂ်ီဘြမ္ေမွာ္ hte  နန္မျဖဴထန္ပရားေမွာ္ ni lawm ai lamu ga shara re. Ya na zawn tara shang shara masat ya ai majaw lai wa sai ten majoi hkrup mara jawm htu sha nna shingra makau grupyin hten za ai lam ni hkyam sa wa na re” nga nna Danai Mungdaw Rapdaw Dat Kasa Zaw Win tsun da ai re.

Grak lagra n re sha Pat (ပယင္း) htu shaw shara masat ya ai lam hpe Munghpawm Hkringmang Dap a lam matsun hte maren June 23 ya shani Jinghpaw Mung Nhprang Sut Rai Magam Dap kawn  ndau da ai re hte Hpakant, Lawng Hkang ginra na lamu ga Eka 3700 jan, Se Zin ginra kata na lamu ga Eka 2600, Jahtu Zup ginra kata na lamu ga Eka 13000 ni hpe mung grak lagra n re sha ja hku shaw na matu shara jahkrat ya na lam Mungdaw Asuya kawn ndau da ai lam na chye lu ai.

Leave a Reply

Your email address will not be published. Required fields are marked *