Adup sat hkrum ai amyu shayi a moi mang hpe ga kadoi jep ai lam galaw

Kutkai Ginwang, Nampaka Buga, Nam Sung mare na adup sat hkrum ai Jan Nhkum Nang Htang a moi mang hpe Lashio tsi rung kaba kaw ga kadoi jep joi sai lam chye lu ai.

July shata 3 ya shana, mara kata adup sat hkrum ai mabyin hte seng nna kadai wa re ngu n lu madi madun lu shi ai majaw mahtai hpe atsawm sha chye lu na matu shi a moi mang hpe ga kadoi lajang da lu sai raitim bat mi daram na yang she mabyin a mahtai lu na re lam Nampaka Buga na Sara Maran La Nau tsun ai.

Adup sat hkrum ai jan Nhkum Nang Htang gaw ning rum ningtau wa hkam kaja lam n nga ai majaw kasha yan hpe jawng shabrai kachyi kajaw sha pyi garum lu na matu Nam Sung mare kaw gat seng kasha hpaw let nga ai ten ya na zawn adup sat hkrum ai re hte shi a n-gup hte ladi hku sai pru ai hte na pawt kaw mang taw ai sha ai rai nna nhka mung ga ayai mat ai lam chye lu ai.

Nam Sung mare hta lai wa sai ten Mung shawa dum nta htinggaw 70 daram shanu nga ai mare re hta ya aten hpyen majan a majaw hpyen koi yen mat nhtawm Mung shawa htinggaw 20 daram sha nga sai hte Myen Hpyen Dap HK.L.Y (261) hpyen hpung ni mung 2016 shaning kaw nna Nam Sung mare hta nga hpang wa ai re hpe chye lu ai.

Ya aten jan Nhkum Nang Htang a moi mang hpe Lashio tsi rung kaw ga kadoi ai lam galaw ngut nhtawm Nampaka mare de bai htaw hkrat wa nna July (6) ya shani Namhpaka lupwa kaw makoi mayang galaw sa wa na re hpe mung chye lu ai.

Leave a Reply

Your email address will not be published. Required fields are marked *