Laiza IDP Jawngma Kanu Kawa Hkrum Zup Hpawng Galaw

2013-14 ning hpaji ladaw, no (1) lang na Laiza lahta tsang jawng hte Laiza lawu tsang jawng (IDP) a jawngma, Kanu Kawa, Sara hkumra hpawng hpe dai ni hkying (10:00)am aten Laiza Muklum, Lahta Tsang Jawng Wang, Rawt Ninghkawng Gawknu hta galaw ai lam chye lu ai.

Ndai hpawng hta Jawng sumtang tang madun ai lam, Lahta Tsang Jawng hte Lawu Tsang Jawngma ni a Ka hkrang hte mahkawn hkawn dan ai lam, 2012-13 ning hpaji sharin ladaw hta awng dang la lu sai Tsang ningnan kaw na Tsang 10 du hkra no.1 kawn 5 du hkra shang ai jawngma ni hpe kumhpa shagrau ya ai lam, dawn jan hkra shakut shaja ningja shaw sharin ya ai Sara/num ni, jawng nhprai hkra shakut shaja ai Sara/num hte jawngma ni hpe shagrau kumhpa jaw ai lam ni hpe galaw sai lam chye lu ai.

Hpawng hta Wunpawng Mungdan Shanglawt Asuya, Ginjaw Hpaji Dap Ningtau Lithkam Sara Kaba Chyinyu Hkun Nawng kaw nna ginjaw hpaji dap a yaw shada ai hte maren kung kyang ai sharin Sara ni hte atsam ningja rawng ai magam gun kaja ni hpe shalat sa wa na matu, amyu sha hpaji masa lam hta ta tut woi awn sa wa na rung tsang hte tsang hpaw shagreng sa wa na matu, amyu sha hpaji masa lam yan hte bungpre nna prat madang dep ai sharin ginhpan, sharin ladat lai masa ni hpe myit mang jasat sa wa lu na matu hpaji jaw mungga jaw ai. Matut nna jawngma kanu kawa yawng a gawng malai Saranum Kaba Machyang Kaw Ing kaw nna mung mungga shaga ai.

Ndai hpawng hta makam masham hpung woi sara ni, Jawng Sara/num, jawngma Kanu Kawa ni, hpaji dap na Salang ni, makan dap magam dap de na saw shaga da ai Salang ni hte jawng ma ni yawng marai 800 daram sa du ai hpe chye lu ai.

Leave a Reply

Your email address will not be published. Required fields are marked *