Share Shagan Masat Ninghtoi Byin Wa Ai Mabyin

August shata 10ya shani Jinghpaw Wunpawng Amyusha ni galaw nga ai Share Shagan Masat Ninghtoi gaw Shawng nnan KIO/KIA hpe woi ningshawng lai wa sai Share Shagan GOC Lahpai Zau Seng hpe hpyen ni gyam sat kau ai ninghtoi re lam chye lu ai.

Share Shagan GOC Lahpai Zau Seng gaw 1975 ning August shata praw 10ya shani Thai mungdan Bankok hta dap jung tawn ai KIO Dat kasa rung kawn Chingmai Ginwang kata na KIA hpyendap de sa wa ai lam lapran Htam Ngaw Kawng ngu ai shara hta Tai hpyen ni gyam sat kau ai lam labau hta sagawn chye lu ai.

Dai nhtoi hpe Wunpawng Mungdan Ginjaw Komiti kaw nna Share Shagan Masat Nhtoi ngu Myithkrum shagrin dat ai rai nhtawm 2006 ning kawn mungdan kata shara shagu hta shaning shagu galaw hpang wa ai re lam mung chye lu ai.

Wunpawng Mungdan Shanglawt Hpung, Ginjaw Komiti  Tingyang Up Lanyaw Zawng Hra a 2016 Ning Share Shagan Masat Ninghtoi shatsam mungga hta “Daini na nhtoi gaw Wunpawng mungdan hte wunpawng Amyu sha ni a matu manu dan dik ai nhtoi re lam hte asak du baw ap nawng lai wa sai share shagan ni yawng a myutsaw myit hpe manu shadan hkungga jaw let Awmdawm lawt lu lam magam bungli ni hta n-gun da ting matut shakut sa wa ga” nga nna n- gun jaw shatsam ai lam nga ai.

Share Shagan Masat Nhtoi lamang hpe Wunpawng Mungdan shara shagu hta galaw ai lam mung matut na chye lu ai.

Leave a Reply

Your email address will not be published. Required fields are marked *