Myen hpyen hpung ni KIA shawnglam Hpyen Dap ni de hpyen nbungli, laknak kaji kaba ni hte laja lana htim gasat nga

KIA Masat (5) Dap Ba, Masat (3) Dap Dung ginra, Point (1103) hte Kagam kaw du nga ai Myen hpyen hpung ni January (8) ya shani hkying (9:45)Am kaw na KIA hpyen hpung ni nga ai Nga Gyang, Hpaw Daw hte Sama Krung de laknak kaba ni hte (40) jan lang gap bun nna hkying (10:5)Am kaw na mung Jet Fighter (2) hte Law Hpyu hte Tang Lai maga de numdaw (5) lang wa htim gap nhtawm hkying (2:20)Pm ten kaw na sinat kaji, Jet Fighter (2) hte bai kahtap gap ai lam na chye lu ai.

January (7) ya shani hkying (10:30)Am ten Hpaw Daw hte Daga Yang lapran de htu shadut lung wa ai Myen hpyen hpung ni hte KIA hpyen hpung ni gasat gala majan byin nna hkying (11:40)Am aten Awng Ja lawu Kase Hka mahkrai kaw du nga ai Myen hpyen hpung ni hpe KIA hpyen hpung RPG, 79MM gap bun ai kaw na Myen hpyen hpung ni grup gra de sinat kaji ni hte gap ai lam chye lu ai.

KIA Masat (2) Dap Ba, Masat (14) Dap Dung ginra, Mung Hkawm Myen Hpyen Dap ni January (7) ya jahpawt hkying (2:10)Am kaw na (3:40)Am laman Noi Je Bum Pat Maw sinpraw maga Shan Ta post hte Nam Gawn lam Samak Zup lapran kaw laknak kaba (15) lang gap bun ai lam na chye lu ai. January (6) ya shani hkying (5:30)Pm ten Hka Da Zup kaw nga ai Hk.L.Y (297) Dap na Myen hpyen hpung ni KIA post maga de sinat kaji, MG-42 mi hte shawng gap bun nna 60MM (9) lang bai bun nga ai lam nga ai.

KIA Masat (4) Dap Ba, Masat (9) Dap Dung ginra, Nam Hkam kaw na Muse maga pru wa ai Myen hpyenla htaw mawdaw (21) hpe January (6) ya shani hkying (10:30)Pm aten KIA hpyen hpung ni Nawng Lawng hte Nam Lawng lapran kaw hkap shingla gasat dat ai lam chye lu ai. January (6) ya shani hkying  (2:58)Pm aten Ta Mu Nye maga kaw na lagaw lam yu wa ai Myen hpyen hpung ni hte KIA hpyen hpung ni Kut Hkai Masat (1) lapran tsang jawng makau kaw gasat gala byin ai majaw Myen hpyen hpung ni sinat kaji kaba hte dai gasat gala byin ai grup yin ni de gap bun ai hta makau kaw nga ai sau seng na Num kasha (2) hte Maring palawng hpun da ai La langai si sum mat ai lam nga ai. Myen hpyen hpung ni gap bun ai sinat kaba si hkrat ai majaw Kut Hkai lawk (6) kaw na Salang Zau Shan a nta kaw mung wa hkra nna ya aten dai shara de Myen hpyen hpung ni shara la nga ai majaw Mung shawa ni kadai mung lai wa lai sa nmai galaw nga ai lam chye lu ai.

KIA Masat (6) Dap Ba, Masat (36) Dap Dung ginra, Hpun Pyen Yang kaw January (7) ya shani hkying (11:45)Am ten Myen Hpyen Dap Dap Nu (99) kata na hpyen hpung ni hte KIA hpyen hpung ni gasat gala majan byin ai lam shawnglam shi sawk ni shana wa ai kaw na chye lu ai.

 

Leave a Reply

Your email address will not be published. Required fields are marked *