2011 Ning June (9) Kaw Nna Myen Hpyen Dap Ni Wunpawng Buga Ginra De Majan Shabyin Chyinglau Rawng Wa Ai Majaw Byin Hkrum Hkra Nga Ai Sat Lawat Tang Madun Ai Lam

2011 Ning June (9) Kaw Nna Myen Hpyen Dap Ni Wunpawng Buga Ginra De Majan Shabyin Chyinglau Rawng Wa Ai Majaw Byin Hkrum Hkra Nga Ai Sat Lawat Tang Madun Ai Lam

2011ning June shata (9) ya shani Myen hpyen Dap ni kaw nna majan baw hpang dat masai. Dai majan hpe KIO maga hku nna shawng Myen Mung Asuya hpe gap hkat jahkring ta masat htu na matu bawngban sai raitim nhkap la ya ai majaw Mung kata majan gaw grau she grau laja wa sai, 2017 ning June (9) ya rai jang (6) ning hpring sai re.

(6) ning laman hta byin hkrum hkra ai sat lawat ni hpe mu mada dep hkap ai made sawk sagawn tang madun dat ai.

HPYEN MAJAN HTE SENG AI LAM

  1. Myen Hpyen Dap ni htim gasat ai majan gasat poi ( 3500) jan lang rai sai.
  2. Wunpawng Mungdan kata, hte Mungmyit Sinli Ga de Myen Hpyen Dap Dap jung shara jat wa ai ( 200 ) hkawt rai sai.
  3. Wunpawng Mungdan kata, Myen Hpyen Dap ni hpyen n-gun jat da ai Dap Dung yawng ( 58 ) daram re ai.
  4. Mungmyit Sinli Ga de jat wa ai Myen Hpyen Dap Dap Dung (70) jan daram nga ai.
  5. Wunpawng Mungdan kata, Pyitutsit Wuhpung (5) hpaw da nna Rudi amyu sha shada manghkang byin hkra galaw nga ma ai.
  6. Tinang Amyu hte Mungdan hpe makawp maga let share shagan tai wa sai Myutsaw hpyenla ni mung law law nga sai.
  7. Amyu hte Mungdan a matu tinang a hkum hkrang lagaw lata sak jaw ap nawng ai Myutsaw Mungtsaw Share Ninghkring ni mung grai nga sai.

Mung shawa hta jadip jahpang ahkang aya nga ai Mung masa Bandung de du hkra sadi dung magrau grang let Rawt Malan Magam Bungli hta matut hkawm sa dingyang rai nga ai.

HPYEN KOI YEN MUNG SHAWA HTE SENG AI LAM

  1. Tinang a dum nta mare buga hpe tawn kau da nna hpyen koi yen hkawm ra mat ai mung shawa (144,000) jan rai sai. Ya mung matut jat nga dingyang re ai.
  2. Hpyen majan a majaw hten bya mat sai mare buga yawng (367) hkawt rai sai.
  3. Hten bya mat sai Hkristan nawku jawng (254).
  4. Buhdda Hpunggyi jawng (18).
  5. Ma shalet jawng (110).
  6. Laika sharing jawng yawng (101).
  7. Mare Tsi Rung Tsi jaw gawk (230) re ai.

Ndai zawn hpyen yen hkawm nga ai Mungchying Mungshawa hpe nga shara dum nta, malu masha, Tsi mawan, buhpun palawng hte Dinghku lang arung arai ni hpe Nawku Hpung ni, Mungkan Garum Ningtum hpung ni, shinggyim wuhpung wuhpawng ni garum ningtum jaw ya nga ai. Kalang lang garum ningtum dumhprut ai, Myen Asuya kaw nna, garum ningtum pat hkum ai ten ni hta KIO uphkng ginra kaw nga ai hpyen yen ni hpe KIO kaw nna n-gu, malu masha, tsi mawan, nga shara hte kaga ra mara lit la ya ra ai hta laning mi rap shara Miwa Yuan sen (40) hte (50) lapran Myen Gumhpraw rai yang Ks. Sen (6000-7000) lapran garum shingtau madi shadaw nga ai lam chye lu ai.

SHINGGYIM AHKAW AHKANG HTE SENG AI LAM.

  1. Myen Hpyen Dap kaw nna, roi rip zingri sat kau ai Mung masha marai (20) jan,
  2. Roi Rip zingri machyi hkrum mat ai masha marai (60) jan,
  3. Hkum Shan roi rip hkrum ai Wunpawng Shayi marai (80) jan sai.
  4. Rim hkrum htawng bang ai masha (250) hkawt rai sai.

Ndai zawn mara kata roi rip zingri ai,  Amyu shayi ni hpe Hkum shan mazut roi rip ai hkyuk htawng bang kau ai ni grai naw nga ai lam mung chye lu ai.

MAJAN A MAJAW HKAMLA LU AI LAM NI

  1. Wunpawng Amyu sha ni shada kahkyin gumdin lam grau lu la ai.
  2. Mung Masa mahkrum madup machye machyang grau lu la ai.
  3. KIO hte Mungshawa ni grau mahkri shawn makai hkak wa ai.
  4. Nawku Makam Masham Hpung ni shada hku hkau kanawn mazum lam grau lu la ai.
  5. Wunpawng amyu sha ni a Mung masa hpe Mungkan de shadan shadawng lu ai.
  6. Rudi Amyu sha rawt malan hpung ni hte kahkyin gumdin lam lu la ai.

Ndai tang madun ai jahpan chyarang lawnglam (Data) ni gaw, tengman jet ai simsa lam a matu , n-gun dahpran shara langai mi rai lu u ga ngu myit mada let Matsing Ningting Makan Dap kaw nna tang madun dat ai.

Share