JINGHPAW MUNG DU SALANG NI HTE ENGLISH DU KABA MR. NORTH, MR HNC, STEVENSON, NO. 2 MUNGKAN MAJAN A HPANG 1946 NING HTA HKRUM SHAGA AI LAM

Mungkan majan No. 2 ngut mat ai hpang 1946 ning laman ten hta, Mr, NORTH hte MR HNc Stevenson yan, Jinghpaw Mung, Myitkyina de lung wa nna Mung Masa hte seng ai ra ahkyak (Emergency )lam ni bawngban tsun jahkrum na matu, tau hkrau nna shana da sai hte maren, Myitykina, Man Hking mare e, Zuphpawng Mandat kaba galaw nna mahkawn choir hte hpawn di nna hkap tau la ma ai.

Dai hpawng hta Jinghpaw Mung, Sam Mung, shara magup na Du salang ni du hkum ai majaw masha ram ram law nga ai. English Du Mr, North wa gaw, Manmaw Myitkyina Ginwang hpe yu up ai Du Kaba (special Commisssionor ) re ai lam chye lu ai. Mr, HNC Stevenson wa gaw, Lahta Myen Mung lahta Bum ga jarit up ai (Diractor of fron-tiors Areas Administration officer) re ai lam hpe chye lu ai.

Shawng nnan Mr, HNC Stevenson Du kaba wa tsun ai gaw, dai ni Jinghpaw Mungdu Salang law law hte hkrum shaga lu nngai majaw grai kabu nngai nga ai, Bai ngai ndai zawn ahkyak lawan ai hku nna Jinghpaw Mung de du lung wa nna hkrum shaga ai lam gaw,

1. N0.2 Mungkan Majan hta anhte American, English ni, si htum na daram nsi htum ai sha, lam amyu myu hku nna asak hkye garum ya ai majaw, chyeju dum mayu ai.

  1. Dai hta n-ga, Nanhte Jinghpaw ni gaw yawng hta grau nna magrau grang ai hte garum ai majaw Majan lawan ngut ai re, ngu myit lu ga ai.
  2. Anhte Inglik ni gaw,(Spoon foak) hte Pawng Muk sha ai. Nanhte Jinghpaw ni gaw Lata hte shat sha ai ni rai nga ai. Raitim Karai Kasang hta gaw langai sha rai nga ga ai. Dai majaw Nanhte Jinghpaw ni hpe anhte Inglik ni hku nna tsaw ra Pu, Sin, Machyi, Nhtoi Shang Hkawng Woi gali, let chyeju htang kumhpa jaw mayu ga ai.

Anhte Inglik ni jaw na kumhpa gaw Du Salang langai, lahkawng sha akyu hkam sha ai baw kumhpa nre. Jinghpaw Wunpawng Amyusha ni Prat janat akyu hkam sha lu ai kumhpa hpe jaw da mayu ga ai.

Dai gaw kaga nre. Kade nna yang, anhte Inglik Asuya kaw nna (Colonies) Mayam yam tawn ai Mungdan yawng hpe Shanglawt jaw kau na hku rai sai. Shaloi nanhte Jinghpaw ni, Myen, hte rau Shanglawt hkum la mu.

Myen hte rau Shanglawt la jang, Lani mi Myen ni nanhte hpe, n tara. roi rip dip sha na marin dai. Dai majaw Myen hte Shanglawt rau nla ai sha, loi hpang hkrat nna la mu, ningngu yang anhte Inglik ni nanhte Jihghpaw ni hpe, Moi na zawn shaning law law, naw up sha mayu nna nre. Hkru Du zawn sumnung nna, Lapu zawn Zai rawng_ai__Myen ni nanhte Jinghpaw ni hpe ntara dip_sha na tsang nna, Tsawra_myit hte tsun ai sha re ngu lajin let tsun wu ai.

Dai shaloi, Sama Duwa Sinwa Naw gaw, lahkawng masum lang rawt grawng gra nna ninghkap shaga na hkyen wu ai. Shaloi Mr, North wa gaw Sama Duwa hpe Duwa Naw Dung u, ndai Du kaba wa shaga ngut jang she shaga u, .Zuphpawng a tara gaw, marai langai shaga ngut jang she kaga wa shaga na htung nga ai, ngu wu ai. “ti

Raitim, Mr, HNO Stevenson wa shaga ngut ai hte Sama Duwa Sinwa Naw rawt tsan ai gaw, Myen ni anhte Jinghpaw ni hpe dip sha jang Katawng Kau na rai nga ai,nga nna Nhtu nhku shaw shada ai kum la madun dat wu ai. Shaloi Mr,Stevenson wa gaw Duwa e,Moi na Myen nrai sai. NO. .2 Mung-kan Majan hpang na Myen gaw madang grai tsaw mat sai, ngi tsun dat wu ai. Shaloi Sama wa kalang bai rawt tsap nna Nhtu nhku jum shada let, Moimung Myen Katawng ai re, Ya mung Katawng na sha re,nga ninghkap shaga wu ai.

Dai hpang Mr, Stevenson wa gaw lata layung manga hpe Du Salang ni hpang madun nna, Manga ning sha Myen hte hpang hkrat Shanglawt la mu. Manga ning laman Mung Up, hpaji sharin ya na ngu mu ai.

Matut nna tsun ai gaw, Ga shadawn U tsip na U hkalung ni gaw Kraw ai hte Pyen nna lu sha nchye tam sha ai hte U yi, Ula yan tam jaw ra ai. Loi na shingkaw kung jang she, tinang chyu tam sha ai. U kanu yan mung ntam jaw ra mat sai. Dai hte maren nanhte mung loi hpang hkrat mu Dai laman Mung up hpaji sharin ya na. Nanhte a lamu ga kanang kaw nna re ai hpe anhte chye nga ai majaw anhte nan garan ga reng ya na made ai,ngu kroi anoi tsaw ra myit hte tsun lajin dan u ai.

Shaloi Jinghpaw Du Salang ni hpa ntsun mat masai. Raitim Duwa Wabaw Zau Rip gaw, Ga she hkindit hkra rai nna shan hpraw Du yan a Shaboi she lahtum hkra di nna tsun ai gaw, Nanhte Inglik ni, Manmaw Ga e shaning 60 ning jan Hkahku Mung e 25- 30 ning jan Up sai. Gara kaw laika sharin jawng hpaw ya mani nra ga ai, nga marawn let tsun dat wu ai.

Shaloi shingdu de dung nga ai Du Salang ni malawng maga re teng ai , shanhpraw ni tsun ai ga nra ga ai nga nna lata lamu de ladawn nna, marawn tsun ma ai.

Dai aten hta lawm ai Sara Ga Du Zau Raw ya Shanglawt Hkristan Hpung Sara kaba.hte hkrum tsun chyai yang, re teng ai dai ten hta lata ladawn n-gun dat shut kau nna mashi kashin mat ai ya du hkra machyi nga ai nga nna mani hpa tsun u ai.

Duwa Zau Rip a ga majaw Du Salang yawng Mr, Stevenson a ga ninghkap tsun ai majaw Inglik Du yan gaw, Myi, Man, Sum rai, bai tsun ai gaw anhte Inglik ni gaw nanhte Jinghpaw ni, hpang de hpa byin na hpe tsang nna tsawra myit machyi nna tsun ai sha re.Raitim dai ni nanhte Du salang ni dai daram nga jang, Hpawt hpra de she le, lama nga jang gaw anhte hpa nchye sai yaw, nga nna Mandat ntsa na myiman sum let yu mat wa masai rai.

1946 ning January shata laman, Boshuk Aung San hte Hp,S,P,L Myen salang nkau mi Ingland LONDON mare e, Inglik Asuya Du kaba ni hte hkrum ai hpang wunjishuk (primeminster) wa gaw, Myen Mung e, nanhte Myen ni hkrai nga ai nre, kaga Mungchying bum masha law law mung nga ai re. Dai ni yawng a myit hkrum ai lu jang she, Shanglawt lam myit ya na, ngu Boshuk Aung San hpe tsun dat wu ai.

Dai shiga hpe Ranggung e nga ai Inglik Du ni mung na chye masai. Raitim dai lam hpe Aung San wa gaw. Bum Masha, Mungchying masha ni hpe, kachyi mi mung ntsun ai ip da wu ai. Lama Bum masha ni chye ,jang anhte nlawm yang nmai a hka nga nna Myen hte npawng wa na hkrit nna rai nga ai.

Riatim Inglik Du ni gaw, Jinghpaw ni hpang de yak na tsang ai majaw, Manmaw, Myitkyina hpe yu ai Mr. North wa hkrai shawng Manmaw de lung wa nna Duwa Zau Lawn ( Chairman of District Council) Salang Labang Grawng, Salang Maraw Tu , Capt. Gaw Lu Tu, ni hte hkrum nna Myen Mung Shanglawt lama jaw yang, Jinghpaw ni gaw Myen hte n pawng ai sha (Dominion) la na matu shi hkrai shawng wa tsun sai. Dai lam hpe Capt. Hkun Naw hpe Inglik Asuya kaw yawng a malai laika tang na matu myit hkrum da masai.

Dai hpang Mr. North wa gaw Myitkyina de bai lung wa nna, Myitkyina Ginwang na Du Salang law law hpe shaga hpawng nna Manmaw e myit hkrum sai lam hpe tsun sang lang dan wu ai.

Shaloi Sama Duwa hte Duwa Zau Rip woi awn nna, Mr. North wa tsun ai lam hpe aja awa ninghkap kau ma ai. Myitkyina nna Manmaw Du Salang ni hpe mung myit nhkrum lawm ai lam ( Chye Nan) hte shana masai.

Dai aten hta Sama wa a ( P.Y.K.Hp.) ngu ai kung hpan hpung hpe shagreng wa nna, Duwa Zau Rip gaw Pawng Yawng Ram Rawt hpung hpe woi awn sa wa ai hpung rai nga ai. Manhking mare na Salang Lagyi Yaw woi awn ai Hpung Sasana Ram ma Hpung hpe pyi shi a Ram rawt hpung de woi gale la kau ai rai lu ai.

Dai kaw nna, Sama Du wa hte Duwa Zau Rip gaw, Hugawng ga shara magup, Sumpra bum lam mayan shara magup, Mung Shawa Zuphpawng galaw nna, Manmaw ni myit hkrum ai Inglik a (Dominion) Up hkang lam hpe myi nhkrum na lam aja awa hkaw tsun masai.

Ndai lam ni a majaw 1946 ning, September shata hta Mr. North wa. hte Mr. Stevenson yan rau sha, Jinghpaw Mung de lung wa nna, Manhking mare e Mung du Salang hkum ai Zuphpawng kaba hta du sa ai Du Salang myit-su malawng maga Mr. Stevenson a ga hpe Ninghkap kau nna, Myen hte pawng let Shanglawt la na de man yawng mat ai re.

Dai ten hta Jinghpaw Du Salang nkau mi, Myen hpe Shu a Rum gum htawn rai, myit masin salum mahkra ap nna grai kam ai ni mung nga ma ai. Myen ni Inglik a dung lahkum kashun la nna Uhkru hkang Uka kalai rai, Jinghpaw ni hpe dai ni na zawn dip up sha na ndum ma ai. Myen malai nga ai hte maren ( Chya ko chyau lok shin go ko shing ka chya htet sao) rai na hpe Mr. North, Mr. Stevenson ni aja awa shadum tim ndum mat ai gaw sum kaba rai nga ai.

Dai ni Myen hte Shanglawt la kau ai shaning (60) ning du magang sai. Raitim anhte Jinghpaw Wunpawng sha ni, ( Kachin) Asuya hku nna up hkang ai ahkaw ahkang Lamin chyang mi pyi nnga ai. Asuya Rung Kaba nkau mi hta Jinghpaw ni langai lahkawng lawm ai raitim, Myen Asuya a Mayam sha re. Moi Myen ni Inghlik Asuya a Rung kaw (Wuntawk aye paing galaw ai hte maren sha rai nga ai)

Raitim 1961 ning, Frebruary 5 ya shani, kaw nna Myen e dip ai kaw na lawt na matu, K.I.A., K.I.O. madang du hkra rawt malan myitmang hkrum lu mat ai gaw, anhte Jinghpaw wunpawng sha ni tinang nang sai hte galai nna, Chyurum Jinghpaw wunpawng Amyusha Asuya Sharawt la lu ai hku saga ai.

Raitim, 1994 ning February shata 24 ya shani kaw nna Myen hte mung masa lam bawngban ai nlawm ai sha. Gap jahkring ai san san dai ni du hkra, galaw kau ai majaw anhte Jinghpaw Wunpawng sha ni a balen yawm mat ai hpe mu lu nga ai.

Myen hte Gap jahkring lam tam ai n kaja ai nre grai kaja ai rai tim aten shadawn shadang nnga ai, Mung Masa n shaga lu ai. Aten nau galu mat ai hpe mu lu nga ai. Myen ni a matu grai kaja tim anhte Jinghpaw Wunpawng sha ni a matu grai machyi nga ai.

Lahta na mabyin lam ni mahkra gaw anhte Jinghpaw ni shada da myit hkrum ai lam nnga ai majaw rai nga ai. Moi shawng de anhte Jinghpaw Wunpawng sha ni Myen hpe kade ding tim, Nhkyau daram gaw naw magaw ai ngu kam ga ai. Raitim Jinghpaw Wunpawng Amyusha nkau mi Myen hpe she daini du hkra kam nna shut ai lam law law hkrum hkra lai wa saga ai law.

Dai majaw Daini anhte Jinghpaw Wunpawng Amyusha ni Inglik a lata na Shanglawt lu ai shaning 60 ning du wa tim, Myen a mayam tai ai gaw, 1948 ning, Shanglawt lu ai kaw nna daini du teng rai nga ai. Moi Inglik gaarai ndu yang anhte Jinghpaw Wunpawng Amyusha ni gaw, gade mayam mung nre Myen a mayam mung nre, Tinang magam, Wala Htanbam, nga madu mungdan nga nna up nga ai ni rai ga ai.

Raitim Inglik shang wa ai kaw nna Myen Mungchying sha ni yawng, Inglik a mayam tai ra mat ga ai. Anhte Jinghpaw Wunpawng sha ni gaw, Manmaw ga e shaning 60 ning, Myitkyina Putao ga de 25-30, ning sha up lu ma ai. Myen ni gaw tsa ning hkawt Inglik a mayam Di Kap rai ma ai. Dai sha nrai anhte Jinghpaw Wunpawng sha ni hte Bum ga masha Mungchying sha ni yawng, ( Hill Bribes People) yawng mung myen a mayam tai lai wa saga ai.hpe galoi mung nmai malap kau saga ai law.

Dai hta grau nna Myen Hpunau ni Inglik a lahkum hta kalai dung nhtawm, ya aten hta gaw, anhte Jinghpaw Wunpawng sha ni yawng, Myen a mayam tai ai madang rai nga ai. Hpa majaw nga yang anhte Jinghpaw Wunpawng Mungdan ( Kachin State) nga tim Mung Masa ahkaw ahkang hpa nnga ai majaw Myen a mayam rai nga ai hpe dum chye ra nga ga ai law.

Dai majaw daini kaw nna, anhte Jinghpaw Wunpawnp Amyusha ni,

  1. Amyu n-gin hka
    2. Lu su ngamai madang n-gin hka
    3. Rusai lam n-ginhka
    4. Makam Masham lam n-ginhka ai sha Jinghpaw Wunpawng Amyusha shada da tsawra Pu,sin machyi, nna, shada da Nhtoi shanghkawng woi gali, myitmang hkrum shajup Pali ngang ngang rai nna, Hpung Parti lam n shalaw ai sha Hkindit lahkrip ra ra Chyurum Jinghpaw Wunpawng Amyusha Rapdaw hpe, hpaw ninghtan la nna, Amyusha ni yawng hpe woi awn sa wa na” gaw, ra ahkyak dik kaba rai nga mali ai law.

Moi lai wa sai ten na shari ni hpe pat chyam na shatai nna, Dai zawn nbyin hkra sadi maja sa wa ga law.

Moi shawng de Myen mung, shanglawt rai n-lu yang Jinghpaw mung e, byin lai wa sai lam.

Leave a Reply

Your email address will not be published. Required fields are marked *