Hkawm Wa (Kunle) Rev. Yo Jawng Hawng Hkawng A Magam Gun Prat Labau Kadun

Hkawm Wa (Kunle) Rev. Yo Jawng Hawng Hkawng A Magam Gun Prat Labau Kadun

Sawk sagawn ai, Rev. Dr. N-Gan Tang Gun

Mungkan Madang hte Shingdaw Lu ai Sasana Hkrun Lam.

Tsaban 20 ning a kaang prat hta tsaban 21 de du shang wa ai laman, KBC Mungkan hpe kawan hkawm lai wa sai Rev. Yo Jawng Hawng Hkawng (Kunle) hte laika ka ai wa hkrum shaga, san jahkrup yu ai shaloi lu la ai shiga gaw lawu na hte maren rai nga ai.

  1. Rev. Yo Jawng Hawng Hkawng a magam gun ladaw 54 ning laman shi a lagaw hte hkawm kau da sai hkrun lam yawng gaw deng seng masum mun lahkawng hkying mali (324000 deng) rai sai ngu hkam la nu ai.
  2. Rev. Yo Jawng Hawng Hkawng mungga tsun shaga ai nawku hpawng, zuphpawng ginra yawng 8100 rai nna,
  3. Ja Mungdan Hkrun Lam hpe 553 lang; Myit Masin Jamna hpe 185 lang; Amo laika hpe 100; Si Ging ai Yubak Sanit a lam 85 lang hte Hkalup jaw lawm ai masha 2000, hte hkrum sai lam sakse hkam nu ai.

Ndai zawn Mungkan sasana kawan Sara ni hte shingdaw nna hkrun lam hkawm let sakse hkam nga ai Rev. Yo Jawng Hawng Hkawng a labau kadun hpe mung lawu na hte maren bai nhtang myit yu let n-gun la ga.

  1. November 24, 1924 ning, Salang Yo Jawng Lum Hawng hte Zetau Lum Naw a dinghku kaw nna shangai wa sai.
  2. September 9, 1934 ning hta hkalup hkam la nna nga nga yang, Japan majan byin ai majaw 1941 ning kaw nna 1945 ning du hkra Jinghpaw Leve hpyen lahkawn ai de shang lawm let, Mungdan hpe makawp maga ai bungli hta gun hpai lai wa sai.
  3. 1946 ning, May 25 ya shani kaw nna Jinghpaw Wunpawng Chyum Jawng (Kutkai) kaw Chyum mungga sharin la lu nhtawm, 1947 ning hta awng pru wa sai.
  4. 1948 ning kaw nna, Sam mung Ginwang Mung Jet, Loi Ya hte Mungbaw buga hpung ni a kawan sara tai ya let 1951 ning du hkra magam gun lai wa sai.
  5. 1954 ning kaw nna Jinghpaw mungdaw sasana ginra de lung wa nhtawm, Hkahku mung shara shagu di du kawan hkawm lai wa sai.
  6. 1949 ning e Sara jan Lahtaw Nang Awng hte dinghku de la nu ai. 1955 ning kaw nna Myitkyina Ginwang a sasana kawa sara bungli hpe hkam la nga yang, 1965 ning, Geis Masat Htingnu kaw sari lu lata mara aya dang hkam la nu ai.
  7. 1978 ning kaw nna Rev. Yo Jawng Hawng Hkawng hpe, grai ra ahkyak rai nga ai KBC a sasana kawan bungli de madang shatsaw ya ai hkam la nu ai.
  8. September 13, (Laban hpang manga ya) 2002, ning e Chyum Hkawlik (Nawng Nang) sharin sara/num ni hte jawngma ni hku nna KBC kawan sara Rev. Yo Jawng Hawng Hkawng hpe hkap hkalum, shagrau sha-a ai nawku hpawng galaw let, shi kaw na munggan ni hpe mung hkam la lu saga ai rai.
  9. 2008 ning March (30) ya shani KTC a Lungseng Jubili Aten hta Makam Kasi shagrau hkrum sai rai.

 

Sawk sagawn ai, Rev. Dr. N-Gan Tang Gun

Madi shadaw laika ni
1. Laika ka ai wa hte 12th Sept, 2002 ya shana san jahkrup nna lu la ai shiga.
2. Zahkung Yaw Ting. Rev. Yo Jawng Hawng Hkawng hte Sasana Hkrun Lam. KTC, L.Th sawk sagawn laika, 1989.

 

Share