Jinghpaw Mung kaw Media hte seng nna shawng nnan lang ngu na ning-gun madun

Jinghpaw mungdaw kata shiga wanglu wang lang sawk na ahkang lu na matu Jinghpaw mungdaw kaw nga ai shi sawk ni pawnghpawm nna July (7) ya shani Myitkyina muklum kaw shawa ning-gun madun hpawng galaw ai lam chye lu ai.

NLD Asuya nnan lakhtak kaw nna shiga ni hpe sawk na matu grau yak hkak wa ai. Tsun shaga ahkaw ahkang lu ai Asuya Hkringmang Salang ni mung shiga htai ya ai shaloi asan sha nchye na shangun ai, ip da ai lam ni nga ai majaw ya na zawn shi sawk ni n-gun madun ai re nga nna woi awn ai shi sawk tsun da ai.

N-gun madun hpawng hta shanglawm ai shi sawk langai mung “Jinghpaw Mungdaw Asuya hte Jinghpaw Mung kaw nga ai Media ni a lapran manghkang ni n-nga wa yu ai raitim ya na Asuya gaw mi na Asuya hta Media ni hpe ahkyak nla ai lam ni a majaw re” nga nna tsun ai.

Jinghpaw Mung kata nga ai shi sawk ni yawng shanglawm ai rai nhtawm N-gun madun ai shara gaw Mungdaw Tara Kasa Rung, Mungshawa hkringsa ginsup chyai ginra ျပည္သူအားကစားကြင္း hte Wan Leng Daru ni hta re lam chye lu ai.

Dai N-gun madun hpawng hte seng nna Shi sawk ni kawn Asuya hpe tang madun da ai lam ni hta Mungdaw Asuya kawn Mungshawa hte seng ai lam ni hpe aten dep shana ya, Asuya a magam bungli ni hpe shata mi hta kalang Mungshawa hpe shi sanglang hpawng woi galaw ya, Media hte seng nna manghkang nga wa yang Myen Mung Media Kongsi (MPC) hte san jahkrup ra na lam, Media hpe jum tek ai Pukma ၆၆(ဃ) hpe lawan dawm na matu hte Myen Mung Asuya kawn rim da ai shi sawk ni hpe lawan dat ya ngu ai lawnglam ni re hpe ndau shabra laika shapraw da ai kaw na matut chye lu ga ai.

Leave a Reply

Your email address will not be published. Required fields are marked *