August shata (10) ya Wunpawng Amyu Sha ni a Share Shagan Masat Ninghtoi

Wunpawng Amyu masha ni hta lu ging, lu ra ai mungmasa ahkaw ahkang, shinggyim ahkaw ahkang ni n hkam la ai re majaw, Munghpawm Myen Mungdan Asuya de lai wa sai ji woi ji wa ni tara shang tang shawn lam law law galaw lai wa masai hpe labau hta mu chye lu ai. Rai timung, hpyi shawn ai ahkaw ahkang ni n lu mai ai hta sha n-ga, grau grau nna dip up shagyip shagyeng hkrum wa sai hpe chye lu ai. Nhkam sharang lu wa ai lam ni a majaw, Wunpawng Amyu Sha n lang hpe tsaw ra masin machyi ai myu tsaw ninghkring ni gaw, lu ging, lu ra ai, mungmasa ahkaw ahkang, shinggyim ahkaw ahkang lu la na matu, Munghpawm Myen Mungdan Asuya hpe laknak lang rawt malan ninghkap gasat na jawm daw dan masai rai nga ai.
Amyu Sha rawt malan gasat lam ngu ai gaw, du daw sai hkaw law ra ai hpe chye nga ai rai timung, hpang jahtum kaga lam n nga ai, koi yen n lu sai majaw, dai rawt malan bungli hpe General Lahtaw Zau Seng gaw tawk hprut daw dan nna ningbaw lit la woi awn galaw lai wa sai re hpe chye lu ai.
Wunpawng Amyu masha ni a rawt malan majan hpe 1961 ning February shata praw (5) ya shani mungshawa zuphpawng kaba galaw nna ndau shabra nhtawm Asuya hpe ninghkap gasat ai kam npawt hpang dat sai rai nga ai. Ndai Wunpawng Amyu Sha rawt malan majan hpe woi daw dan, woi n pawt hpang dat ai, n loi la ai Amyu Sha magam bungli hpe woi ningbaw wa ai General Lahtaw Zau Seng gaw, 1975 ning August shata (10) ya shani n hkru n kaja ai hpyen ni a lata hta asak sum mat wa sai rai nga ai. Amyu sha ni dip up hkrum ai kaw na lawt lu shajang na matu, Amyu Sha rawt malan magam bungli kaba hpe woi daw dan, woi npawt hpang ai Ningbaw Kaba General Lahtaw Zau Seng hpe n hkru n kaja ai hpyen ni e gyam sat hkrum sai nhtoi August shata (10) ya hpe N0. (12) lang Wunpawng Mungdan Shanglawt Hpung Ginjaw Komiti Hkum Ra Zuphpawng hta Wunpawng Amyu Sha ni a Share Shagan nhtoi ngu masat da sai re lam hte Wunpawng Amyu Sha ni a rawt malan magam bungli hta asak ap nawng mat wa sai share shagan ni yawng hpe hkungga masat masa ai hku kahpyawn nhtawm masat nhtoi hpawng shingra hpe August shata (10) ya shani Wunpawng myu sha ni shanu nga ai buga shara shagu hta hkungga la ra shagrau sha-ah ai lam galaw ai re hpe chye lu ai.

Leave a Reply

Your email address will not be published. Required fields are marked *