Kasung Mare Masha Ni Hpyen Koi Yen Nga

Kasung mare kata de Myen hpyen ni August (11) ya shani hkying (10)  aten   kaw nna sinat kaba gap bang nhtawm htim gasat shang wa ai majaw mung mare masha ni dumbri dumbra mare kata kaw nna hpyen koi yen  hprawng pru wa ai lam na chye lu ai.

 

Kasung mare gaw buga gaw sharawt mare re, KIA Dap jung ai lam nnga ai, mare kata hta KIA ni hkap gap ai lam mung nnga ai, Myen hpyen Dap ni mare kata sinat kaba shawng gap bang nna lagaw Dap ni hte htim shang wa ai hpang mare masha ni hkrit kajawng nna hprawng bra wa ai hpe sinat laknak gaba  ni hte hkan gap dum bre bun ai majaw mare masha si hkala hkrum ai re lam na chye lu ai.

Kasung mare na hprawng yen wa ai mare masha ni hpe Lam Braw Yang RC, Englicand, Hkalup hpung, Namati mare makam masham hpung shagu, Pat jasan hpung hte garum kahtau hpung ni yawng pawng hpawm nna, mare masha marai (600) daram hpe woi la lu sai, matut manoi naw hprawng pru wa ai majaw modo ni hte tau la nga dingyang re, ya aten nam hkan makoi hprawng nga ai mare masha law law naw ngam nga ai hpe naw matut woi la ra ai lam mare masha ni hpe sa tau la ai Sara langai tsun ai.

Myen hpyen hpung ni gaw Kasung mare kata du shang wa ai hpang Jawng Sara num Woi Tsai hte salang. Nwaw La Tsaw yan hpe rim woi da nna mara kata gap sat kau ai sha n-ga mare masha law law mung naw rim da hkrum ai re hte nkau hpe mung gap sat kau ai lam, mare masha nkau gaw hprawng ndep na naw makoi hprawng yen hkawm nga ai lam, hprawng pru wa ai mare masha ni tsun ai hpe na chye lu ai.

Kasung hka wan jak makau kaw August (10) ya jahpawt kaw nna Byuha Hmu Col. Awng Than Htwe woi awn ai Ts. K.Hk (3) kata na Myen hpyen dap Hk.M.Y (381) hte  Hk.M.Y (384) pawnghpawm hpyen hpung ni KIA Masat (11) Dap Dung ginra de htu shadut lung wa ai majaw gasat gala byin hpang wa ai raitim Aug (11) ya jahpawt kaw nna myen hpyen ni Kasung Gaw sharawt mare kata de sinat kaba gap bang nna htim gasat shang wa ai hpang she KIA hpyen hpung ni hte shani hkying (1:25) Pm kaw nna Kasung mare shinggan kaw gasat poi matut manoi byin wa ai re hpe shisawk Ing Raw tang madun da ai.

Leave a Reply

Your email address will not be published. Required fields are marked *