47 lang na Sama Ginwang Hkalup Hpung Ginjaw Uphkang Kasa Zuphpawng hte (9) lang na Hpung Shawa Zuphpawng galaw

Knet; 2009 ning October 28 ya.

(47) lang na Sama Ginwang Hkalup Hpung Ginjaw (SHG) uphkang kasa zuphpawng hte (9) lang na Hpung shawa zuphpawng kaba hpe Laiza Muklum, Nawng E Hku buga hkalup hpung jawng wang hta galaw na re lam chye lu ai.

Zuphpawng hpe 2009 ning October 28 ya kawn November 2 ya shani du hkra galaw sa wa na rai nga ai. Ndai zuphpawng hta Sama Ginwang a magam gun ningnan ni hpe lata san mat wa na hte sasana magam bungli ni hpe bawngban dawdan shagrin sa wa na lam chye lu ai.

Zuphpawng sa du lawm na Sara kaba ni, Kasa ni yawng gaw dai ni du zup na hte zuphpawng hpe dai na hkying 6:30 Pm aten hpawng hpaw hpang sa wa na rai nga ai. Shana hkying 8:00 Pm aten hta Nawng E Hku buga hkalup hpung masha ni a yungwi pinra hte hkap hkalum na lam hpe chye lu ai.

Sama Ginwang kata buga hpung (19) nga ai rai nna, zuphpawng hta Ginwang kata Hkalup hkam sai Sape hpung masha marai (50) a gawng malai Kasa marai (1) shang lawm sa wa na hte, Kasa yawng marai 200 daram sa du na re lam chye lu ai.