Jinghpaw Mungdaw Simsa Lam Lu La Ai ( 15 ) Ning Hpring Masat Masa Shana Lu Sha Poi Zup Hpawng Kaba Galaw.

Knet ; 25, February, 2009

Jinghpaw Mungdaw, Simsa Lam Lu La Ai ( 15 ) Ning Hpring, Masat Masa Shana Lusha Poi, Hpawng Lamang Kaba Hpe Jinghpaw Mungdaw, Myitkyina Mare, Shatapru Lawk, ( National Park ) Wang, Manau Gawknu kata hta, 2009 Ning, February 24 ya shana 6:00 pm aten kaw hpang nna, 9:00 pm aten hta ngwi pyaw ai hte hpawng hpe galaw ngut kre la lu ai lam chye lu ai.

Zuphpawng hta shawng nnan, Sara Kaba Dr. Saboi Jum tsun mat wa ai hta-

N-dai Zawn Saw shaga da hkrum nna, Zup hpawng kaba hta sa du shang lawm nga ai Salang ni yawng hpe hkungga let, hkap tau hkalum la ai hte kabu chyeju dum ai lam hpe shawng nnnan tsun mat wa sai. Dai hpang Jinghpaw Mungdaw Simsa Lam tam ai. Du Wa U Byit Tu hte Du Wa Lahtaw Hkun Seng, Jinghpaw Mungdaw Asuya Hkring mang Salang magam gun lai mat wa sai Du Wa Lawang Li, Hpung Up Sara Kaba Dr. Saboi Jum hte (Catholic) Father Lawt Naw ni yawng hpe mung Prat tup chyeju galoi n-malap ai lam tsun mat wa ai. Dai hta n-ga Simsa lam lu la wa ai shingdu labau hpe a-zing a-yang tsun hkai dan nna, hpum dim ai lam chye lu ai. Bai nna, Tinang Myen Mungdan kata e shanu nga ai, Amyu sha shagu yawng, myit hkrum mang rum, gahkyin gumdin let n-dai Simsa Lam hpe matut nna, ngang grin sa wa lu na matu, myit mada yaw shada ai lam ni hpe mung tsun let, hkalum Mungga hpe hpungdim ai lam chye lu ai.

Dai hpang Jinghpaw Mungdaw M.P.Kh. Taing Mhu Soe Win a malai ningtau Taing Mhu San Htun mungga tsun ai hta-

Ya na zawn, Jinghpaw Mungdaw ( 15 ) Ning hpring du hkra simsa lam lu ai majaw grai kabu ai lam, bai nna, Myen Mungdan kata hta e shanu nga ai Amyu Masha yawng rau sha myit hkrum gahkyin gumdin lu na hte ya na zawn simsa lam matut ngang grin lu na hpe mung ra sharawng ai hte myit mada ai lam ni hpe tsun let hpung dim ai lam chye lu ai.

Dai hpang, Wunpawng Mungdan Shanglawt Hpung, a Tingnyang Up Ning Baw Kaba a Malai, Tingnyang Up malai ( 1 ) Du Kaba Gauri Zau Seng kaw nna mung, n-dai zawn Jinghpaw Mungdaw simsa lam lu la ai ( 15 ) ning hpring ai majaw, myit hta kabu ai lam, simsa lam tam magam gun shakut shaja lai wa sai, Hpu shawng Hpu ba ni, Salang ni hte Sara kaba ni yawng hpe mung chyeju dum ai lam shawng nnan tsun lai mat wa sai. Dai hpang Jinghpaw Mungdaw kata kaw KIO gaw Asuya hte mungdan simsa lam bawng ban sa wa ai lam hta 1980 ning a shawng e ( 2 ) lang bawng ban lai wa sai lam, 1980 ning hta simsa lam tam salang ( 5 ) lapran kaw tsap ya nna, bawng ban lai wa sai lam, shata ( 10 ) bawng ban nna, n-byin mat sai hte, 1981 ning may shata ( 30 ) ya hta bawng ban lam hkring mat sai lam, shaloi lawm ai simsa lam tam salang ( 3 ) n-nga mat masai hte, dai na Sara Kaba Dr. Saboi Jum hte Du Wa Lahtaw Hkun Seng gaw ndai kaw dung lawm ai majaw, grai kabu lu ai lam, shaning ( 10 ) ning daram na yang, Sara Kaba Dr.Saboi Jum gaw, Du Wa La wawm, Salang Lahtaw Hkun Myat yan rau n-nga mat sai, Ningbaw Kaba Brang Seng hte bai hkrum nna, 1980 ning hta n-awng dang ai simsa lam bungli hpe 1989 ning May shata kaw nna, bai shakut wa sai hte ( 5 ) ning lapran kaw ginhkrang shakut ai hte dai ni lu la tawn ai Asuya hte KIO gasat shazim simsa lam myit hkrum ga sadi laika hpe 1994 ning February shata ( 24 ) ya shani, Asuya maga kasa salang ( 3 ), KIO maga kasa salang (3 ), simsa lam tam salang ( 3 ) tamasat jawm ka tawn ai rai sai lam hte Munghpawm Myen Mungdan a shawnglam a matu n-dai lu la tawn sai simsa lam hpe bai n-shamat kau hkra tamasat jawm ka tawn ai maga ( 3 ) ni yawng hta lit nga ai rai nga mali ai lam, simsa lam hpe shakut galaw wa labau kadun tsun dan let ga hpundim sai hpe chye lu ai.

Dai hpang shana shat malu masha jawm sha nna, shangut masai lam chye lu ai.

Photo- Knet;