(36) Lang na JHZ Hpung shawa zuphpawng hte Ninghtan Hpung hpaw ai 100 ning hpring chyeju shakawn hpawng.

Kachinnet 2010, March, 29 ya.

Manmaw Ginwang, Manmaw mare, Roberts Sasana Wang hta March 27 ya shani kawn (36) lang na Jinghpaw Wunpawng Hkalup Hpung Shawa Zuphpawng hte Ninghtan Hpung hpaw hpang ai (100) ning hpring chyeju shakawn hpawng hpaw hpang sai hpe chye lu ai.

Ndai zup hpawng hta March 27 ya shani hkying 7:00-8:00 am aten hta Roberts Sasana wang hkapang kaw hpung shawa ni zuphpawng nna Rev. N Hkum Tu Hkum kyuhpyi shaman ya nhtawm, Rev. Lai Maw Gam shaman let lai sumri rep di nna mandat chyinghka de yan shang wa sai, mandat chyinghka de du ai hpang Rev. N Hkum Grawng Ji a kyu hpyi rai nna lai sumpan hpe Rev. Paul Naw Tawng, Rev. Dashi Awng Dun, Rev. Nang Zing Tu Ja hte Rev. Lahpai Shing Rip ni rep di nhtawm Mandat kata de shawa masha yawng yan shang wa sai, de hpang Manmaw Ginwang Ningbaw Rev. Lahpai Shing Rip gaw KBC Ningbaw Rev. Kum Shin Zau Awng hpe Mandat ap ya sai lam hpe chye lu ai.

Matut nna ndai zuphpawng hta KTC Nawng Nang hte KTC Kuthkai jawngma dingsa (600) jan hkrum zup bawngban sharin hpawng mung galaw ai rai nna jawngma dingsa hpung hpaw ai yaw shada ai lam gaw 1. KTC Lahkawng yan rawtjat galu kaba wa na lam hta shang lawm na lam 2. Trustee a matsun hte shatsam ai lam ni hpe galaw na 3. Jawng ma shada da hku hkau kanawn mazum, garum shingtau hkat nga na lam ni rai nga ai.  Shana de Sara Kaba Ja Gun a Doctor Of Divinity (DD) Janmau hpe hkalum galaw ai lam hpe chye lu ai.

(36) lang na JHZ hpung shawa zuphpawng hte Ninghtan hpung hpaw ai 100 ning hpring chyeju shakawn hpawng hpe March 27 ya shana 6:30 pm aten shawa mandat hpring kabrat mat hkra hpaw hpang sai, KBC Amu Madu Rev. Labya Paul Naw Tawng kawn sumtsam dat kasa ni hpe shachyen ya nhtawm hkalum ga kadun tsun dan ai hta ndai  36 lang na JHZ hpung shawa zuphpawng gaw Ningpawt ninghpang de bai sa ai re lam hte lai wa sai A.D. 1910 hta Mung (3) Manmaw, Myitkyina, Mungmyit-Sinli gaw rau sha hkrumzup nna Jinghpaw Hkalup Ninghtan Hpung hpaw hpang ai hta yaw shada ai lam gaw 1. Shara shagu bra nga ai Jinghpaw Wunpawng amyu sha ni rau sha bai hkrum zup nna Karai Kasang mungga hpe akri akrai sharin la lu na matu. 2. Hkrum zup kanawn mazum ai gahkyin gumdin n-gun hte Karai Kasang a Mungdan grau maden jat wa hkra ngu ai hte lai wa sai 100 ning hta hpaw hpang da sai Jiwoi Jiwa ni a myit jasat hte maren karai chyeju shakawn let asak magam bungli hpe bawngban nhtawm Karai Kasang a Mungdan grau maden jat wa hkra ngu hkalum mungga shaga ai.

Ndai Zuphpawng gaw March 31 ya shani du hkra galaw na rai nna KBC a magam bungli law law hpe mung bawngban dawdan na re lam hte Buga shagu na hpung shawa Mun kaba lam sa du na re hpe chye lu ai.