Laiza Muklum hta Wunpawng Amyu Sha Mungbawng Rapdaw Woi Awn Ai Myit Hkrum Munggyit Laika Lata Masat Ka Zuphpawng galaw

Knet; December 7, 2006

2006 ning December shata praw 7 ya jahpawt hkying 9:00 AM aten KIO uphkang ginra rai nga ai Laiza Muklum, Laiza Hotel hta Wunpawng Amyu Sha Mungbawng Rapdaw woi awn ai myit hkrum munggyit laika lata masat ka zuphpawng galaw ai lam chye lu ai. Ndai zuphpawng hta tinang KIO asuya kaw nna Ginjaw salang ni hte NDA (K) kaw na salang ni sa du shang lawm ai rai nga ai.

Ndai myit hkrum munggyit laika lata masat ka ai hpe zuphpawng hpaawn kaw n’na mahkyen hti ngut ai hpang, mahkyen (1) masat da ai sara kaw na hpawng hpaw kyu hpyi ai lam galaw ai. Mahkyen 2 hku nna zuphpawng Tingnyang Up rai nga ai Wunpawng Amyu Sha Mungbawng Rapdaw ningbaw Maran Zau Nan kaw nna hpawng hpaw mungga shaga la ai lam, mahkyen (3) hte maren zuphpawng hpaawn kawn myit hkrum munggyit laika hpe hti ndau ai.

Mahkyen (4) hta ai myit hkrum munggyit laika hpe tinang KIO asuya gawng malai Mungchying Uphkang Dap lithkam Salang Kaba Lajawng Hkawng Lum hte Tau Dap Awn Daju Du Kaba Hpunggan Zau Nan ni lata masat ka ai rai nna, NDA(K) ginjaw gawng malai lit shatsam hkrum ai Salang Manghkyi Zawng Hkawng hte Salang Chang Bawm ni lata masat ka ai re hpe chye lu ai. Ndai myit hkrum munggyit laika lata masat ka zuphpawng hpe Wunpawng Amyu Sha Mungbawng Rapdaw woi awn ningbaw Maran Zau Nan kaw n’na sakse tai ya ai hte sakse lata masat ka ai.

Mahkyen 5 hta Zuphpawng Tingnyang Up Sara Maran Zau Nan kaw na zuphpawng hpungdim dat mungga shaga la ai, mahkyen 6 hta maren zuphpawng hpungdim dat kyu hpyi ai lam hte mahkyen 7 hta kyu hpyi shaman ai hte zuphpawng hpe 9:45 AM hta hpungdim dat sai. Dai hpang uhpung lahkawng maga na du sa ai salang ni rau sha man hkrum lu sha hpe jawm sha ai hte myit hkrum munggyit laika lata masat ka ai zuphpawng hpe hpungdim dat ngut kre la lu sai lam chye lu ai.

Ndai myit hkrum munggyit laika lata masat ka ai zuphpawng hpe KIO Tingnyang Up Ningbaw Kaba Lanyaw Zawng Hra hte NDA(K) Ningbaw Kaba Zahkung Tingying kaw nna mung lata masat ka shagrin da sa wa na re lam chye lu ai.

WMR Ningbaw Maran Zau Nan kaw na hpawng hpaw mungga shaga nga yang

KIO Ningbaw Kaba kaw n'na laika lata masat ka nga yang

NDAK uhpung a malai laika lata masat ka nga yang

KIO uhpung a malai lata masat laika ka nga yang