Ninggawn Daju Gawdin Ninghkring Ni Hpe Hkap Tau Hkalum

Knet; December 10,2006.

Lai wa sai 2006 ning, December praw (9) ya shana maga hkying 4:00 PM ten hta Laiza Muklum Zup Awng Simsa ginsup pa hta, Ninggawn Daju Gawdin ninghkring ni hpe hkap tau hkalum la ai lam chye lu ai.

Dai gawdin ninghkring ni gaw Wunpawng Mungdan Shanglawt Hpung (KIO) kawn hpaw ninghtan tawn ai Ninggawn Daju Gawdin hpung ginsup ninghkring ni rai nna, Myitkyina kaw hpaw ginsup ai, Jinghpaw Mungdaw Uphkang Du, Du Kaba Ohn Myint a gawdin ninggang gashun shingjawng poi hta e No.(1) lu nna awng dang wa ai gawdin ninghkring ni rai nga ai. Dai gawdin ninghkring ni hpe Laiza Muklum kata kaw na mung shawa ni, jawng ma ni hte tsi sara num ni kabu gara let nampan shanghkawng hte hkap tau la ai lam chye lu ai.

Ninggawn Daju Gawdin ninghkring ni hpe hkap tau hkalum ai hpawng hta hpawng Tingnyang Up hku nna Du Kaba N’hpang Naw Bu woi awn let hpawng hpang wa sai. Dai hpang awng padang dip la lu ai ninggang hpe ginsup komiti de ap ai lam galaw nna, Ninggawn Daju ginsup woi awn ai komiti ningbaw Du Kaba Pauhkyi Zau Hpan kawn gawdin ninghkring ni hte seng ai lam, kaning rai shakut na No.(1) lu wa ai lam ni hpe sang lang dan sai.

Dai hpang Wunpawng Mungdan Shanglawt Kongsi, Ningbaw Malai Lat Du Daju Jum Du Kaba N’ban La kaw nna gawdin ninghkring ni hpe hkum tsup ai hku shatsam mungga shaga ya sai.

Ninggawn Daju ginsup woi awn komiti kaw nna awng padang dip wa ai gawdin ninghkring ni hte sharin ya ai sara ni hpe kumhpa shagrau ya sai. Bai nna gawdin ginsup shingjawng ai hta ningtawn kumhpa lu ai gawdin ninghkring ni hpe mung shagrau kumhpa jaw ya sai hte gawdin ninghkring ni hpe hkap tau hkalum ai hpawng hpe hpungdim dat sai.

Dai hpang du sa ai shawa ni hte gawdin ginsup ninghkring ni yawng manhkrum lu sha hpe jawm sha let Ninggawn Daju gawdin ninghkring ni hpe hkap tau hkalum hpawng angwi apyaw sha awng dang ai hte ngut kre la lu sai lam chye lu ai.