KIC Ningbaw Kaba hte Salang ni hpe Hkap Tau Hkalum Hpawng

KNET. November 12, 2006

2006 Ning November shata praw 11 ya shani hkying 3:00 pm ram hta Myulawt Wunli Htingnu kaw Yangong kaw nna Laiza de bai du wa ai Ningbaw Kaba Lanyaw Zawng Hra hte Ninggawn Amu Madu Du Kaba Dr. La Ja hpe ngwi pyaw kabu gara ai hte hkap tau hkalum la lu sai lam hpe chye lu ai.

Ndai hkalum zuphpawng hta KIC Amu Madu Salang Kaba Lama Gum Hpan kawn Ningbaw Kaba hte hpung ni hpe hkap hkalum la ai lam shana let hpawng mahkyen hpe ndau dat ai.

De hpang Ningbaw Kaba Yangong kaw nna bai du wa ai lam hte seng nna sang lang dan ai lam hta, Ndai zawn Mung Shawa Dap Shawa myit hkrum mang rum let alum ala hkap hkalum la ai majaw gabu ai lam, bai nna Yangong de sa mat wa ai gaw (1) NC hta sa ai Dakasa Salang ni hpe wa sa nhtawm seng ang ai N.Y.K Salang ni hpe sa hkrum bawng ban ai lam (2) Sa du nga ai laman hkum hkrang hta ra rawng ai lam hpe jep joi ai lam ni rai nga ai.

Ndai NC hte seng ai lam gaw matut manoi galaw ra ai lam hpe galaw nga ding yang rai nga ai, rai nna N.Y.K Salang ni hte sa hkrum bawngban ai lam hta 1994 ning kaw na gap hkat jahkring tawn da ai lam hta shada grau nna hkan shatup let simsa lam grau ngang kang wa lu hkra galaw mat wa na lam, shada numdaw numdan n nga ai sha buga gaw sharawt bungli hpe ndut ndang galaw sa mat wa na lam hte kaga bawngban jahkrup ai lam ni gaw, Namti Jumdwi Jak Rung hte seng ai lam, Amyu sha masat lekmat hte seng ai lam ni rai nga ai hpe chye lu ai.

Bai jahtum hku nna Ningbaw Kaba Lanyaw Zawng Hra gaw tinang a dum nta de bai du wa ai nga ai gaw kabu gara dik ai lam re, rai nna du sa ai Mung Shawa Dap Shawa yawng hpe ndai zawn anhte shada myit hkrum mangrum gahkyin gumdin ta gindun nga yang gaw anhte a yaw shatawng shada tawn da ai pangdung hta awng dang lu na re ngu zup hpawng hpe hpung dim dat ai.

Ningbaw Kaba Lanyaw Zawng Hra hte Ninggawn Amu Madu Du Kaba Dr. La Ja hpe hkap tau nga yang

Ningbaw Kaba Lanyaw Zawng Hra hte Ninggawn Amu Madu Du Kaba Dr. La Ja hpe hkap tau nga yang

KIC Amu Madu Salang Kaba Lama Gum Hpan kawn hkalum ga tsun nga yang

Ningbaw Kaba Lanyaw Zawng Hra kawn mungga gadun tsun nga yang

Photos by KNET.