Manmaw hkristan dinghku hpaji sharin jawngma ni a lata hpaji atsam madun poi

Lai wa sai November 18, 2006 ya shani, Jinghpaw Mungdaw, Manmaw Ginwang Roberts sasana jawng wang hta Manmaw Ginwang kaw na hpaw tawn ai hkristan dinghku hpaji jawngma ni a lata hpaji amyu hkum sum hpa madun poi hpe galaw ai lam chye lu ai.

Ndai madun poi hta dinghku hpaji jawngma ni galaw shapraw atsam madun da ai lata hpaji tsawm hpa mawn sumli arung arai ni, arang nlaw ai sha galaw lu galaw sha mai ai namsi hte galaw ai muk ni, htunghking ri da maka arung arai ni hpe galaw madun let dut ai re lam hpe chye lu ai.

Dinghku hpaji sharin jawngma ni a lata hpaji tsawm hpa mawn sumli madun poi hta tinang KIO asuya kaw nna Ginjaw Komiti Tingnyang Up Malai (1) Lat Du Daju Jum Du Kaba Gauri Zau Seng hte Salang ni mung sa du gawan n-gun jaw la ai hpe chye lu ai.

Ya ten dinghku hpaji sharin jawng hta sharin nga ai jawngma yawng gaw marai 53 tup rai nna, amyu shayi ni hta chye ging ai dinghku hpaji, amyu hte htunghking n’mat hkra ri da maka hpaji, tsawm hpa mawn sumli hpaji, galaw lu galaw sha hkai lu hkai sha lam hpaji, jak chywi hpaji, Chyum laika hte kaga myit sawn hpaji ni hpe sharin ya nga ai rai nna jawng lung shaning hpe year 1, 2, 3 hku nna 3 ning tup lung ra ai re hpe chye lu ai. Ndai dinghku jawng kaw na ngut mat sai jawngma ni gaw law malawng buga kata hpung magam bungli ra ai hta jai lang ai rai nna, ndai hta n galaw ai ni mung dinghku bungli hta kungkyang lam ni lu la nga ai lam hpe chye lu ai.