TAU MU HKA MAZUP

By Buhkawm Brang.

Lai wa sai 2007 April shata laman Buhkawm brang gaw manaw manang ni hte N-mai Hka Hku maga de buhkawm mat wa ai. April shata praw rai tim ndai N-mai Hka Hku ga gaw shani shana marang naw htu nga ai. Masha n-htat ai shara re majaw wawt, machyi mayan ni law la nga ai. Ndai shagawng bumga gaw hkrun lam yak hkak la nga ai rai tim Web-site hta la nga ai manaw manang ni a matu gade yak hkak ai shara rai tim du hkra kanaw sa mat wa sai. Ndai lang na buhkawm brang woi sa na shara gaw, anhte Jinghpaw bum ga N-mai hka hku maga de rai nga ai. Sa du chyai na shara grai law la ai, tim ndai lang gaw Tau-Mu Hka Mazup de naw woi sa na rai.

Marit maroi Nmai Hka

An hte hpung ni 21.4.2007 shani Jaw Maw Mare kaw na rawt, Zang Yu Mare kaw wa hkring sa ai,  Zang Yu mare gaw, moi Lawhkawng Ginwang Ninghtawn Rung hte Lapran Tsang Jawng nga ai mare kaba langai rai nga ai.

 

Raitim ya gaw Jawng kaji sha nga sai. Ninghtawn Rung mung n-nga sai. Mare masha ni malawng maga mungdan kata majan byin nga ai ten hta bu htawt mat sai. Ya gaw kaga lahta de na buhtawt yu hkrat wa ai maree hkan na ni sha bai wa nga ai.

Moi na Zangyu Mare masha ngu na gaw nga ai gaw Hting gaw mi sha rai mat sai. Ndai mare hpe yu yang htinggaw 10 ram sha nga ma ai. Anhte du wa ai hte mare masha ni mung bum ga na hpraw san la ai myit jasat hte hkap hkalum la ma ai. Jaw Maw kaw nna Zang yu mare gaw hkying hkum 4 daram hkawm ra ai hkrum lam hta marang hkrai katut nna Zang Yu mare du ai shaloi lagaw kaw wawt hkrai tup rai sai shaw ya taw nga sai. Anhte wawt ni tsan la ngut ai hte jahkring rai yang nta madu ding gai Shan Nga shan hpe ban kaw bang wa nna ndai Shan Nga shan re ju sha mu nga sa jaw ai. Kaw si ai hte hkrak sha rai mat sai. Hpang jahpawt nta madu ni grai mu ai bum ga na htung hking shat mai jaw sha nna anhte hpung ni gaw kan hkru ai hte yaw shada tawn da ai shara de rawt na matu nta madu ni hpe grai n ja let shakram da sai.

 

Zang Yu mare kaw na Tau Mu Hka mazup gaw hkying hkum 3 ram hkawm ra ai. Bum ga na hkrum lam gaw, yu yang mung yu hkrai yu, lung yang mung lung hkrai lung rai ra ai. Dai majaw hkying hkum 3 tup chye ai hte maren Hka mazup sa na re majaw yu hkrai yu ra mat sai. Ndai ga na hkrum lam gaw masha nau nlai ai, jau gawng ni sha lai ai hkrum lam re majaw lam de mung nam hkrai rai nga ai. Dai ni mung chyeju marang hte bai hkrum katut sai.

Zangyu Mare

Marang nhtu tim wawt grai sawng ai shara re wa! ya marang bai htu jat ai gaw kaga tsun shara n nga sai. Sai hkaw masing bai rai sai! Hkying hkum lahkawng ram hkawm ai hte Jahpap Ga du sai. Ndai Jahpap Ga gaw ya yang mare dingsa hkang hkang nga ai sakse sha mu lu mat sai. Ndai mare mung 30 ning ram shakram hkrum kau da ai mare rai nga ai. Ya yang n-lung n-hpan hta jan nna nta shadaw ni pyi n-nga mat sai. Malawng maga Mare kaba de bu htawt nga masai nga chye lu ai. Wawt di let sum ru yu yang anhte N-mai hku buga de gaw shakram hkrum kau da ai mare law law rai mat sai. Ya ngam nga ai mare bu ga ni mung hting gaw 10-20 n-jan ai. Gara de mat mat ai kun? Kanang hkan nga nga ma ai kun ? Ngwipyaw hkamja nga ma ai kun?

Jawmaw Mare hkan rem ai Nga Uhpaw

Jahpap Ga kaw na hking hkum mi tup bum bai yu, dai shaloi tsan tsan kaw na nta kasha lahkawng mu lu ai. Nta kasha dai gaw Tau Mu Hka sin-na hkran kaw na N-mai hka hta wa zup ai nawng kasha makau kaw nan gap da nga ai. Tau Mu Hka mazup kaw nadingdung maga ganoi mile mi ram tsan ai sinpraw maga gaw N-mai hka hta wa lwi zup ai Ngaw Shang hka mazup rai nga ai. Ndai shara makau grup yin hta du sat yam nga tsawm ra nga ai shara rai nga ai. Mare kahtawng hte tsan sai re majaw kalang lang hkawm nga ning len woi hpung, jahkyi, ya, wa du ni hte mung jahkring hkring hkrum katut nga ai.

 

Tau Mu Hka mazup makau hta gap tawn da ai nta de du wa ai shaloi dingla langai hte hkrum ai . Asak maram yu yang 80 ning ram gaw du sana re. Shi gaw Jahpap Lum Hkaw ngu ai wa rai nga ai. Ya yang Jahpap ga hta gadai n-nga sai, shi mung Zang Yu mare kaw she wa htawt nga nna shata man 4 hte 5 lapran ndai hka mazup hta yu wa nna moi kaji kawoi ni a lamu ga rai nga ai hte kaji kawoi ni a hkring htawng dagraw let Nga-rat nga hpe hkwi sha nga ai.

Dai nga langai mi gaw joi mi hte joi lahkawng lapran kaba ai (Jinghpaw Selmon Fish ngu tim nshut na re ). Dai shi gap da ai nta hta pinra htap hte htap galaw nna lu la ai Nga-rat nga hpe garap hta jahkraw da ma ai. Jahkraw ai gaw wan hte re. Shani shana wan wut tawn nna jahkraw la ai rai ma ai. Dai shi jahkraw da ai nga hpe kam ai hku sha mu nga majaw anhte mung n kaya ai sha htim bang wa sai. Nga n-ra mung nau nlawm, shan kaw mung sau sau nga,  grai mu ai majaw masum ram sha kau ai pyi n dum mat ai.

 

Jahpap Hraw Hkaw

Dingla wa hte jahta pyaw taw nga yang asak 7 ning ram re ai ma kasha gaw shi baw ram kaba ai nga langai hpai kagat pru wa ai. Aw.. dingla wa shi hkrai nga shadu ai wa dingla wa hpe na kashu i? ngu san dat yang, ding la wa mani sum rai let tsun dan ai gaw, “ Ma ndai gaw Jahpap Hra Hkaw re ngye kasha rai nga ai”. Myit kata hta mahtai pru sai ngu Nga-rat nga hpe law law sha ra sai...

Bashe Mahkrai

Jiwoi Jiwa ni myit galu galang hte galaw ya ai Lagat mahkrai

Jum shada kaw jum shadu ai shara (Lay Dam lung wa lam)

 

 

 

 

• < Prev