Batsip lungpu

 

Mai Ja Yang mare kaw nna Mile 20 ram tsan ai shara kaw tsawm dik ai shingra maka batsip lungpu 2 nga ma ai. Ya ndai lang na gaw batsip nrawng shi ai lungpu hta sa du chyai ga.

Englik prat na nta hte mahkrai

 

Anhte hpung ni Mai Ja Yang mare kaw nna January, 28 ya shani hkying 11:00 ram hta Batsip lungpu sa na matu dawdan let rawt mat wa ai, dai ni gaw shani kaang rai wa tim naw kashung nga ai majaw kadai mung lum palawng ntat shi ga ai.

 

Hkrun lam kaja nna N-hkawng pa mare hta hking 12:30 ram hta du lu ai, yawng gaw batsip lungpu dai kaw ndu ga ai re majaw Nhkawng Pa mare kaw hkring sa la nna hkrun lam naw san sagawn la let, kan de mung lama ma tam bang ra na re, ngu yawng myit hkrum let hkau soi wan hpra hpra sha la ai.

Kamu zawn san ai mung nga..

 

“Nhkawng pa kaw na gaw nau ntsan sai, madaw lam mung hkrang ai, kahtawng 2 ram lai ai shaloi dai mare hkan san la mu” ngu hkau soi dut ai Miwa num Jinghpaw ga ah manu rai anhte hpe tsun dan ai.

 

Hkying 1:00 ram du wa sai majaw Nhkawng Pa kaw na rawt mat wa sai, Nhkawng Pa mare gaw maning mawru byin ai shaloi mare ting ganoi mawru hta lawm mat wa ai mare rai nga ai, ya yang gaw mare nnan bai de wa ai zawn she rai nga ai, ngang kang ai bilat mahkrai kaba mung chyen mi sha ngam mat sai chyen mi gaw hka mawru hte lawm mat wa sai hpe mu lu ai.

Pu Hka Ja hpe gabrim ai shara shagu mu lu

 

“Ah ga Miwa num dai masu sam sai, kade hkawm mat wa tim mare langai sha naw mu nga ai le” nga manang langai tsun hpang wa sai, kaja mung rai nga ai ya mawdaw gawt wa ai mung grai tsan mat sai, rai tim mare langai sha naw lai ai, mare lahkawng lai ra ai nga majaw mare langai bai hkan tam ai wa ndu hkraw mat sai. “Oh htaw grai sung ai hkaraw npu de masha nga nga ai law” nga na shingdu kaw jawn ai ni marawn wa ai, shaloi anhte mawdaw jahkring da na na bai sa mada yu ai, ndai ram ram sung ai hkaraw she re wa, dai kaw na npu de yu dat ai yang pyi lagaw pyi lagaw she gari wa ai, “gara ma nanhte tsun ai masha ni” ngu ngai san dat yang shan hte bai madun dat ai, “aw hkaraw nau sung nna anhte masha shadu kau ai she re, dai masha ni ya woi tai mat sai” kaja wa mung yu shut chye ai she rai nga ai, dai hkaraw gaw meter 200 ram sung nna Tahkaw hka makau na ga woi hpe yu dat yang tsawm ra kaba ai ga woi ni rai na masha shadu chye nga ai.

Yu mau na zawn san ai ni grai rawng nga

 

Mawdaw bai matut gawt hkyen nga yang dingla langai kawa hpai let lai wa ai, “Ah Gu Batsip lungpu naw tsan ai kun ? “ Ah ga nan hte ni grai lai mat sai gaw..htaw mi lai wa ai mare de she re” ngu dingla dai tsun dat ai shaloi she Miwa num dai hpe grai dum mat sai.

 

Anhte ni dai dingla wa hpe woi mat wa nna mi lai mat wa ai mare de bai nhtang wa sai, dai mare gaw htinggaw 6 ram sha nga ai mare kasha rai nga ai. “Ndai kaw na gaw lagaw lam hte hkawm ra sai, nau gaw ntsan sai htaw..ya mu mada ai htaw ra bum rai nga ai” ngu dingla wa tsun dan ai, mada yu yang grai naw tsan ai she rai nga ai, rai tim du pyi du sai majaw anhte hpung ni mung bai shakut nna lagaw lam hte hkawm sa mat wa sai.

 

"Ndai lam gaw moi na lam dingsa rai nga ai, “anhte Miwa mung de sa yang lana mi lam kaw yup nna mai du ai lam rai nga ai” ngu dingla wa tsun dan ai, lam magyi magaw rai nna nam samum kata hkan magaw shang mat wa sai, manit 30 ram hkawm yang grau sung ai nam kata de shang mat sai, dai kaw na gaw hkaraw de yu ra sai, yu ai lam mung grai kadawng ai, kashawt nna hkaraw de taleng shang mat na mung tsang ra nga ai, manit 20 ram hkaraw de yu mat wa ai shaloi lungpu shang lam hpe mu dat sai.

 

Ahte chyu hkan tam hkawm yang ndai batsip lungpu hpe mu sana nre, batsip lungpu shang ai hku gaw masha langai hkrak ram sha mai shang ai hku rai nga ai, tim kata de shang ai hpang manam maka mau mat ai, manam maka kaba ai lung pu she rai nga ai, kata de mung kade tsa ning majaw byin wa ai shingra maka a majaw kun? Shi na shi tsawm htap dik nga ai, rai tim anhte la sa ai datwan ni gaw kata de nau sin mat ai majaw n-gun nnga mat ai, grau sung ai shara de nmai du mat sai, rai tim ndai makau mayan sha hpyi naw grai tsawm htap nga ai,u-hka ja ni gabrim gabram rai jut shagu kaw nna htoi kabrim dat nga ai, ahte buga ginra hta ndan rai tsawm htap dik ai, nsa du lu ai masha kade she naw nga na kun? Myit hta sumru nna lahpawt nga ai, “sa anhte shang ai nau sung mat sai, ya hkring pru wa ai shaloi jan du mat na law” nga manang nkau mi shadum dat ai, grai gaw myit ndik shi ai, rai tim kaja wa nan mung jandu wa sai majaw yu n law myit ndik tim wa ra mat sai.

 

Dingla wa batsip lungpu shang wa mahka kaw la taw nga ai, nhtoi mu dat ai hte myi ni pyi nmai hpaw na ram rai wa ai, “ndai batsip lung pu gaw grai galu ai re, Miwa mung de du hkra hkren ai, ngai pyi 3 lang sa sai” nga anhte hpe tsun dan ai, anhte gaw nchye ai re majaw masu tim kam ra sai.

 

“N pu de na batsip lungpu naw sa na kun ?, dai de chyawm batsip grai nga ai batsip hkyi mung grai htat nna n-sa she nmai sa hkra nan manam ai ” nga ding la wa tsun dan ai, anhte gaw naw sa mayu ai rai tim, jan shang aten du mat wa sai majaw hpang de she kalang bai arung arai jinghkum nna sa na myit hkrum dawdan tawn da sai.

 

Bai wa ai hkrun lam hpe anhte n-gan myit kau ai she rai nga ai, anhte hkaraw de yu wa ai daram bai lung wa ra sai, lung wa ai hkrun lam wa yak hkak let grau ba ai she rai nga ai, kade lung tim ndu hkraw ai zawn she rai mat sai, kawng ntsa du ai shaloi anhte mung nsa ganoi htum mat ai, rai tim kade ba kade yak ai rai rai, batsip lungpu e...anhte kalang bai du wa na re ngu shakram let nhtang wa mat sai...

Ndai kata de grai kade shang tim htum nhkraw

Bau zawn rai na dum yang ngoi wa ai

By Buhkawm Brang 2005 Jan 28 ya.

 

 

 

 

 

 

 

 

 

 

 

 

• < Prev
• Next >