Laiza Kaw Kahtawlik Nawku Hpung Ni Akyu Hpyi Hpawng Galaw

Laiza Muk Lum Hkritu Hkaw Hkam Nawku Htingnu Jawng Wang hta, 2012 February shat 11, 12 (2) ya tup Nawku Hpung shawa n-gun kaba hte Amyu sha lawt lu lam a matu Akyu hpyi hpawng kaba galaw ai lam chye lu ai.

Akyu Hpyi Ga Baw Ni Gaw

1. Padang Hkrunlam Majan Masing hta anhte Wunpawng Amyu sha ni hkam la lu sai chyeju ni law law nga sai hpe chyeju dum chyeju htang shakawn ai.
2. Jinghpaw Wunpawng Amyu sha ni yawng hte Shanglawt Asuya Magam Dap magam gun kaji kaba ni shut hpyit kau sai mara ni hpe tawngban ai.
3. Ginjaw Komiti Salang ni hte Shanglawt magam gun ni yawng hkam ja nga na hte shanglawt lu ai amyu tai wa lu hkra Mung Masa, Hpyen Masa hte woi awn Ningbaw Ningla ni a matu.
4. Amyu hte Mungdan sha ni a matu Asak ap nawng lai wa sai share shagan ni a Wenyi ni yawng Sumsing Mungdan hta ningngai nga lu na matu hte, Kunding hku Dum nta masha ni yawng mung hkam ja wunli lu na matu.
5. Myit kaji garen hkrum nga ai mung shawa ni hte machyi makaw hkrum nga ai ni yawng shalan shabran ai chyeju lu na matu.
6. Magrau grang ai Myutsaw Mungtsaw share shagan ni law htam wa lu na matu ngu ai ga baw ni hpe madung da ai lam chye lu ai.

 

Akyu hpyi woi awn ai gaw, Ginwang Up Jau Rev. Fr Joseph Nbwi Naw woi awn nna kaga buga kaw na du sa ai Jau ni, Laiza Jau Ginwang hte Hpyen yen Dabang na tara hkaw sara/saranum ni shang lawm woi awn ai lam chye lu ai.

Akyu hpyi lamang hpe Missa Hkungga nawng ya ai, Maria Lung Pu kaw Rosary hti ai, Procession ngu ai hkawm shinggrup akyu hpyi lamang ni hpe kahti galai hkying hkum (24) matut ndi akyu hpyi ai lam chye lu ai. Ahkyu hpyi lamang hta Nawku hpung masha (500) jan dingyang shanglawm ai lam chye lu ai.

Ndai Akyu hpyi lamang gaw lai wa sai 1858 ning February shata (11) ya shani Francis Mungdun, Lourdes mare na, Shayi san pra ai Bernadette kaw Yesu a kanu Chyoi Pra ai Nu Maria dan pru ai n’htoi hpe la nna galaw ai akyi hpyi lamang re lam chye lu ai.

• < Prev
• Next >