Myen hpyen hpung ni KIA ni nga ai shara de laknak kaji kaba ni hte gap bun nga

KIA Masat (1) Dap Ba, Masat (7) Dap Dung ginra, Lawt Mai Yang kaw du nga ai Myen hpyen hpung ni January (29) ya shani hkying (10:00)Am daram kaw na Mali Hka mayan hte Mali hka sinpraw hkran maga laknak kaji kaba hte shani tup gap bun ai lam shawnglam shi sawk ni shana wa ai kaw na chye lu ai.

Dai Myen hpyen hpung ni gaw Bockhole jak, modo, Gong Galang jak ni hpe mung wan nat jahten, Bom shakap kapaw kau ai lam ni gawlaw ai. Nhtan Zup, Ndup Yang Hpyen yen dabang makau hkan mung laknak kaba si ni wa hkrat kapaw ai majaw ya aten Mung mare masha ni hte hpyen yen Mung masha ni Nam de dum bri dum bra hprawng yen nga ai hpe chye lu ai.

KIA Masat (2) Dap Ba, Masat (14) Dap Dung ginra, Samak post maga de htu shadut lung wa ai Myen hpyen hpung ni hte KIA hpyen hpung ni January (28) ya shani numdaw (3) lang gasat gala byin ai re.

ေခ်ာင္းသာကုန္း( Dawi) maga hte Mung Hkawng maga kawn shamu shamawt lung wa ai Myen hpyen hpung ni hpe mung January (28) ya shana daw hkying (7:00)Pm daram hta KIA hpyen hpung ni hkap shingla gasat dat ai kawn gasat gala majan byin ai. Dai shani sha Myen hpyen hpung ni Htang Bra mare maga de laknak kaba (30) jan lang gap sharu bun ai sha n-ga jahapwt hkying (8:00)Am kaw nna hkying (3:30)Pm laman Chyasam Hka mahkrai mayan kaw du nga ai Myen hpyen hpung ni KIA hpyen hpung ni nga ai shara maga de laknak kaba (10) jan lang gap bun ai hta KIA hpyen la ni kya hkumba, bawsin wa ai lam nga ai majaw laknak kaba si ni hta Gung lawm na masa nga ai lam maram da ai hpe chye lu ai.

Leave a Reply

Your email address will not be published. Required fields are marked *