Majan a majaw hpyen koi yen wa ai Mung masha n kau ni hpe Myen Hpyen Dap ni lam lapran hta hkap hkum pat lam galaw.

Myen Hpyen Dap ni hku nna KIA Masat (2) Dap Ba, Dap Dung (14) ginra ni de shani shagu ngu na daram hpyen n gun la ba hte htu shadut htim gasat nga ai hta sha n ga, Sinat Laknak kaba, n bungli hku nna mung gap sharu bun ai lam nga ai.

Dai zawn Myen Hpyen Dap ni gap dat ai sinat laknak kaba si ni Mungshawa ni galaw lu galaw sha ai shara hte mare kahtawng shara ni hta hkrat hkra wa ai majaw, dai grup yin na Mung masha (3000) daram hpyen koi yen ra wa ai, koi yen wa ai Mung masha ni hpe lam lapran kaw Myen Hpyen Dap ni hkap jahkring nna, Num Ma ni hte Asak (50) ning hpring sai marai (800) jan hpe sha lai wa shangun nna, asak naw ram ai La Wa-Ngan ni hpe gaw, Myen Hpyen La ni a shawng lam makawp galaw shangun na matu bai gau nhtang woi ai lam na chye lu ai.

Mung masha marai (800) jan hpe lai shangun dat ai raitim, ya ten dai mung masha ni lam lapran kaw naw dut dang nga ai lam hpe chye lu ai.

Ndai lam hte seng nna, Danai Mare na Myen Mung Rapdaw Dat Kasa Salang Nawng Na Ja Tang hte Lin Lin Oo yen mung lam kaw naw chyat rawng nga ai mung shawa masha (3000) jan hpe lawan hkye mawoi ai magam bungli galaw ya na matu hte ra ai lam shagu hta mung garum la na matu Myen Mung Rapdaw Dat Kasa Ningbaw hpang de January (29) ya shani nhtoi masat hte garum hpyi laika hte tang hpyi da ai lam chye lu ai.

Jinghpaw Wunpawng Hkalup Hpung Ginjaw (KBC) kaw nna mung Hugawng Ginra hta byin nga ai majan a majaw jam jau hkrum nga ai Mung shawa masha marai (3000) jan a matu hte Hkahku Mung Ginwang, Lawt Mai Yang, Nhtan Zup, Sama Bum, Zupra Yang mare hte Ndup Yang mare ni hta majan a majaw hprawng yen nga ai mung shawa ni a matu ja ja ahkyu hpyi ya na lam January (30) ya shani KBC Nawku Mare Hpung shagu de ndau shabra laika hpe ndau da ai re lam chye lu ai.

Lai wa sai January (27) ya shani hta mung, Myen Hpyen Dap Hk.L.Y (297), Tat Ma (101) hte Hkanti Byuha kaw na pawnghpawm hpyen hpung ni, Awng Ja mare na Mung masha marai (10) hpe gap sat kau da nna Num kasha (2) hpe rim gyit woi mat ai re. Rim woi mat ai num kasha (2) hpe January (28) ya shana daw hta bai dat ya ai lam chye lu ai.

Matut nna, KIA Masat (1) Dap Ba, Masat (7) Dap Dung ginra hta mung, lai wa sai January (16) ya shani Mali Yang kaw nga ai Myen hpyen hpung ni KIA hpyen hpung ni nga ai Shara Rum Post hpe htim gasat wa ai kawn matut manoi gasat poi byin ai hpang Lawt Mai Yang mare makau grup yin hkan na Mung mare masha ni Mali Hka sinpraw hkran Nhtan zup maga hpyen koi yen mat ai raitim Myen hpyen dap ni gaw hpyen yen mung shawa ni nga ai shara ni de laknak kaba ni matut manoi naw gap bun nga ai majaw Mung mare masha ni Nam de ayak ahkak hprawng koi yen nga ai re, January (29) yashani hta mung Lawt Mai Yang kaw du nga ai Myen hpyen hpung ni shani tup laknak kaba gap ai sha n-ga Mung shawa ni galaw lu galaw sha nga ai Ja htu arung arai hte Back Hole ni hpe mung wan nat, bom shakap nna kapaw kau ya ai re lam buga masha ni shana wa ai.

KIA Masat (3) Dap Ba, Masat (12) Dap Dung ginra, Maji Gung hte Hka Chyang Hku lapran shamu shamawt lung wa ai Myen hpyen hpung ni hpe January (29) ya jahpawt daw hta KIA hpyen hpung ni hkap shingla gasat dat ai kawn gasat gala majan byin ai lam hpe mung na chye lu ai.

Leave a Reply

Your email address will not be published. Required fields are marked *