(38) lang na KBC Kasa Hpawng hpe ngut kre la lu sai

Waimaw Ginawng, MukChyit Buga kaw March (22) ya shani kaw nna March (25) ya shani du hkra galaw ai (38) Lang na KBC Hpung Shawa Zuphpawng hpe masha marai (40,000) daram shang lam ai hte galaw ngut kre la lu sai re.

Zuphpawng hta KBC hpe matut woi awn na Ningbaw Ningla ni hpe Nomination Komiti kaw na tang shawn da ai hpe du sa ai Hpung Shawa ni kaw nna masat shagrin la lu sai re hpe chye lu ai.

KBC a Ningbaw hpe lai wa sai term na amu madu rai nga ai Rev. Dr. Hkalam Samson hpe bai lata san ai lam, Amu Madu hpe gaw Lawu Ga Ginwang na Hpung Up Sara Rev. Hpauyawng Tu Mai hpe lata shagrin la sai rai nna Magam Dap shagu hpe woi awn sa wa na Hpu-awn ni hpe mung masat shagrin la lu sai re.

Ndai lang Hpung shawa zuphpawng hta gaw Kanu Mungdan kaw nga ai Hpung Shawa ni sha n-ga, Oversea Kachin Baptist Church kaw nna hpung shawa ni, Sinna hkran nga ai India Mungdan, Aronacha Mungdaw kaw nga ai Kachin Amyu Sha ni hte Sinpraw hkran Miwa Mungdan kaw nga ai Kachin Amyu Sha ni mung sa du shang lawm ai re hpe chye lu ai.

India Mungdan kaw nga ai Wunpawng Amyu Sha ni gaw KBC hpe Bau kaba langai ap ya ai hte India kaw nga ai Wunpawng Amyu Sha ni hpe Music hte Jinghpaw laika sharin ya na matu mung sa du garum hpyi tang shawn ai re lam chye  lu ai.

Amrican Hkalup Hpung kaw na du sa ai ni mung KBC Hpung masha ni hpe woi awn zing lum nga ai Rev. Dr. Hkalam Samson hpe shagrau ai hku nna Kachin Amyu Sha ni a matu Scholarship Fund langai jaw ai hta Dr. Hkalma Samson Scholarship fund ngu masat shagrau ya ai lam ni nga ai re hpe mung chye lu ai.

KBC a Hpung Shawa Zuphpawng hpe (4) Ning hta kalang galaw ai rai nna ya ndai zuphpawng galaw ngut ai hpang gaw du wa na 2022 ning hta she bai galaw na re hpe chye lu ai.

Leave a Reply

Your email address will not be published. Required fields are marked *