AI N DI YANG MAT WA MAI AI JINGHPAW LAIKA

Shanhpyi laika labau sawk ai kahpu kawa ni hpe shawng nnan hkungga jaw dat ai.

Moi shawng de anhte Wunhpawng sha ni shanhpyi laika ju adup sha kau sai nga nna n-gup maumwi tsun hkrat wa ai hpe na matsing da nngai.Ngai kaji ai ten kaw nna ya du hkra kam hte n kam gayau gaya ngu ai.Tsun jahta ai ni nga yang mung maju jung nna madat ai. Rai timung dai hpe ngai tup hkrak teng na re ngu garai n kam nna ung ang ai lam byin ai. Shanhpyi laika nga teng, n nga teng ya aten du hkra mahtai sak se kadai mung hkrak garai n lu madun ai.

Shanhpyi laika n nga ai rai yang, ganing re kaw na shanhpyi laika a lam tsun hpang wa ai. Nga ai rai yang ganing rai mat mat ai ngu ai lam hpe myit sawn yu ai shaloi; Laika ngu sawn mai ai “ Maka Kumla” lama ma gaw nga lai wa na sai ngu hkam la nngai.

Rai yang, dai MAKA KUMLA gaw shanhpyi hta ka ai mai byin sani? Ju adup sha kau ai gaw mai byin na a ni?

Shing-ra malu masha hpring ai Wunpawng ginra hte Wunpawng ni a myit masa ntsa mahta nna sawn yu na lam nga wa ai.

Anhte Wunpawng ni gaw kaji kawa ni a jahtawng (si shakram da ai arai) arung arai ni hpe pyi shaning aten na na mahkawng kyem da chye ai, Dai hte maren tsawm ai laklai ai arung arai lama ma lu hta yang mung “Hkanhpa” ngu nna kyem zing da chye ai amyu rai ga ai; shamat ayai kabai kau ai gaw n mai byin ai.

Bai anhte Wunpawng sha ni shanu nga ai ginra shara shagu hta ashu ashan, namlap namlaw, namsi namsaw, mayin machyaw, ninghkrun naitung, sha mai ai alap makrung matsun ni taw ntsang nga ai shara hkrai re. Lu sha kyet kansi garut nna ju adup sha kau ai mung nrai na re.

Ya du maten sawk tam garai n lu ai laika gaw, shanhpyi hta ka ai mi rai yang rai, kaga lama ma hta ka ai rai yang rai, masha prat ban hte ban hta shainggyim masha yawng e manu n shadan n jai lang ai majaw mat mat, n nga mat ai lam rai na sai.

Ya prat jepa maisau hta ka ai Jinghpaw laika ndai grai tsawm grai hkrak ai. Nsen mung hkum ai daram lu pru ai, English Alphabet hte gyin shalat da ai re majaw laika jak laksan gyin shalat la na mung n ra ai, Dr.Ohla Hanson hpe chye ju dum ai.

Jepa maisau laika lu ai latsa ning jan nga sai rai timung, anhte amyusha ni yawng Jinghpaw laika hpe atsawm hkrak garai n chye ra ga ai. Laika hkum jai lang ai loi li shai hkat ai, laika si kaji ka lang ai hte laika hkum kaba ka lang ai ni n bung ai, “g” hte “k” ka jai lang ai n bung ai, laika hkum shani jai lang n hkum ai, n kau mi maigan laika hte gayau kau ai. Gashadawn; “naps;wef; kaw tajumf sha ai wa grai tqif n ajy ai, xkdifckH mung n jaw ai, shara mung grai npfywf dik ai” nga nna tsun ai. Tsun ai wa dai hku tsun jang ka matsing ai wa mung dai hku ka wa ra ai. Hpa lama mi raitim gayau ai law wa jang jahtum e gaw gayau hkrum ai mahtang mat wa ai.

Myu mare kaba hkan nga ai, maigan sumtsan ga hkan nga ai, Wupawng amyusha media magam gun ni ram daw hkum nna Laiza Muklum kaw 2016 ning, November (17/18) hta kalang, Media hkrumzup hpawng galaw ai kaw shanglawm lai wa ni ai. Zuphpawng hta tinang galaw nga ai magam bungli shachyen ya ai, tinang a bungli hta kade daram yakhkak ai, masan sa ai lam ni hpe mung shada da shachyen shaga tang madun ai lam galaw ma ai.

Rai yang ya aten du hkra anhte Jinghpaw laika hte ka shapraw ai, Shi laika, Journal, Magazine, ni kade wa n nga ai, lata layung kadaw pyi garai nhtum ai. Galaw shapraw ai ni mung dingyang matut ndi galaw shapraw lu ai lam n nga ai. Galaw magang yawm magang, grit yawm chyum htum wa magang, jahtum e hkring ra mat ai kaw kre ai.

Jinghpaw laika ka sharawng ai masha n law ai, laika ka ai ni madang tsaw hpaji lu na laika n lu ka bang magang, laika mari hti ai masha n nga magang, mari hti n-gun jaw ai n nga magang laika ka ai masha n nga magang jinghpaw laika hti sharawng ai masha n law ai mayak nga ai nga nna zuphpawng lawm ai Kachin Media shagu sumtang tang madun ai hpe na chye lu ai.

Wunpawng ni hkum gu dek Jinghpaw laika hpe manu shadan jai lang yang gaw lani hte lani laika madang rawt jat wa na lam nga ai.Shanhpyi laika gaw mat sai. Ya lang nga ai jepa maisau laika mung anhte Wunpawng ni jai lang ai lam n nga jang, jahtum e shanhpyi laika zawn mat mat ai laika byin wa mai ai.

N jai lang jang manu n dan sai. Manu n dan jang malap kau sai. Malap kau jang bai tam n mu sai. Tam n mu jang mat mat sai.

Kumshan

Leave a Reply

Your email address will not be published.