Chyurum Wunpawng Amyu Shayi Madum Sumpyi Hpungjat Wunkat Galaw Nga

Wunpawng Mungdan Shanglawt Amyu Shayi Hpung, Htuhking Komiti kaw na woi awn galaw ai chyurum wupawng madum sumpyi hpung jat Wunkat hpe Laiza muklum Simpraw majoi gawknu kaw galaw nga ai re.

N-dai wunkat hpe Htunghking laili laika Magam dap hte ta gindun nna, 2017 ning hta hpaw lai wa sai madun sumpyi wunkat hta sharin hkam la da ai amyu shayi kanu num ni hpe 2018 April praw 10 ya shani kawn April 30 ya shani du hkra hpungjat hku nna hpaw sharin ya nga ai re.

Wunkat ndai kaw wunpawng yungwi mahkawn hte seng nna Du kaba Hpaula Aung Gam hte Ninggawn daju party ningtau amu madu Dkb Yajawng Dai hkawng ni kawn sharin ya ai lam, Htunghking laili laika magam dap na Amu madu Dkb.Zau Tang kawn Htawng ka hte Tar Gaw hpan ni sharin ya ai rai nna Wunpawng sumpyi, Dum bu, hpe mung sharin ya nga ai re nga nna Wunpawng Mungdan Shanglawt Amyu Shayi Hpung, Htunghking Komiti ningbaw Hpawmi Lawhkum San Mai kawn tsun sanglang dan ai.

Du wa na shaning ni hta mung Htunghking laili laika magam dap kawn ta gindun nna Wunpawng Htunghking ka manawt ai hpan amyu myu hte kaga madun sumpyi hpan ni sharin sa wa na matu yaw da ai masing ni mung nga ai nga nna Hpawmi Lawhkum Sam Mai matut tsun ai kaw na chye lu ai.

Leave a Reply

Your email address will not be published. Required fields are marked *