Danai kaw nga ai Myen Asuya Rung ni hte Red Cross ni Awng Lawt mare de lung wa

Myen Hpyen Dap kaw na lit la na ngu shaga la nna Myitkyina kaw na du ai Red Cross ni, Danai kaw nga ai Myen Asuya Rung ni yawng lawm rai nna April (20) ya shani Kawng lam hku nna Awng Lawt Mare de lung wa sai lam Danai mare masha ni tsun wa ai re hpe chye lu ai.

Danai mare kaw chyat rawng nga ai Awng Lawt mare masha ni kadai mung nlawm ai sha Myen Asuya Rung ni hte Red Cross ni sha sa ai lam gaw myit yu hpa re nga nna Hkristan Pawng Hpawm hpyen yen lahkawn lanawn Ningtau Ningbaw Sr. Nhpang Naw Tawng tsun ai.

Danai kaw na Myen Asuya Rung ni hte Red Cross ni lung wa ai lam gaw ya aten majan laja lana naw byin nga ai shara ni rai nna ya na zawn Myen hpyen dap ni hku nna lit la ai ngu na woi lai ai lam gaw manghkang lama ma shabyin nna Shang Lawt hpe mara shangun na matu nyang ai lam re nga nna hpyen masa maram masan ai Salang ni tsun nga ma ai re hpe chye lu ai.

Awng Lawt mare na hpyen koi yen nga ai mung shawa ni matu ra ai garum ningtum lam ni sha n-ga, shimlum ai hte tinang a mare hta nga lu na matu April shata (19) ya shani na ninghtoi masat laika pa hte Jinghpaw, Sam, Naga Laili Laika hte Htung Hkring Hpung ndau da ai re hpe mu chye lu ai.

Hpyen Koi yen nga ai mung shawa ni hku nna gaw Awng Lawt Mare hta Myen hpyen dap she nga yang gaw shanghte hku nna wa n gwi ai lam shim lum lam a matu mung grai hkrit ai lam tsun da ai lam ni mung nga wa sai re.

Ya aten Lai Nawng Hku hta chyat rawng nga ai mung shawa ni hpe mung Myen hpyen dap ni kaw na san jep ra ai lam nga ai ngu pat hkum da ai aten grai na wa sai raitim dat ya ai lam nnga shi ai re hpe mung chye lu ai.

Leave a Reply

Your email address will not be published. Required fields are marked *