Nga Wuloi Htaw Modo Gap Gasat Hkrum Ai Majaw Mung Masha (2) Si Sum Mat

Mung Myit Ginwang, Na Hkaw Mare hte Bu Hka Mare lapran kaw Sep (8) ya shani nawng cho maga kaw nna lung wa ai Nga Wuloi htaw modo langai hpe kadai re nchye ai hpung ni sinat hte hkap gap ai majaw modo driver Salang Tsai Lun Sai asak (30) ning hte modo hpang kaw hkan ai Slg. Ha Tsing yan dai shara kaw si sum mat ai lam ginra shi sawk ni shana wa ai kaw na chye lu ai.

Dai Salang yan hpe kadai gara uhpung ni kawn hkap gap ai hpe nchye lu shi ai raitim dai ginra ni hta lai wa sai August shata kaw nna Myen hpyen dap hte RCSS/SSA hpyen hpung ni htu shadut shang wa ai majaw gasat poi jahkring hkring byin nga ai shara rai nna RCSS/SSA hte TNLA ni mung dai ginra hku htaw shalai ai Nga Wuloi htaw modo ni kaw na gumhpraw hta sha nga ai re hpe buga masha ni tsun ai.

Lai wa sai Septembar praw (6) ya shani hte mung Gangming Loi Dau ginwang, Lai Lin mare hte Lau Yi mare lapran kaw TNLA, MNDAA pawng hpawm hpyen hpung ni hte Myen hpyen dap Hk. M.Y (418) , Hk.L.Y (79) na pawng hpawm hpyen hpung ni laja lana gasat poi byin lai wa sai re.

Lahta Sam Mung hte Mung Myit Sinli Ga Ginra ni hta lai wa sai August shata kaw nna gasat poi matut manoi byin nga ai majaw hpyenyen tsin yam mung shawa (2,000) jan du nga sai lam shi sawk Zau Bawk tang madun da ai.

 

Leave a Reply

Your email address will not be published. Required fields are marked *