Mali Nmai Zup Hka Madim masing hte seng nna Miwa Sumtsan Rung kawn ndau laika shapraw

Mali Nmai Zup hka madim masing hte seng nna Kachin Mung Masa Party ni, Mungchying Mung shawa ni kawn ninghkap ai lam nnga ai, Maigan du nga ai uhpung uhpawng ni sha ninghkap ai re lam Miwa Sumtsan Rung kaw nna ndau laika shapraw da ai re hpe mu chye lu ai.

Miwa Sumtsan Rung kaw nna shapraw da ai ndau laika hte seng nna myu sha lam shamu shamawt nga ai uhpung uhpawng ni kawn dai  ndau laika hpe tsun ninghkap nga ma ai re.

“Kachin Mung Masa Party Ningbaw ni hte Miwa Sumtsan Salang Mr. Hong Liang hkrum ai shaloi Mali Nmai Zup hka madim masing hte seng nna hpa tsun ai lam nnga ai dai majaw Kachin Mung Masa Party hte hpa nseng ai lam, Kachin Mung Masa Party a policy gaw Mung shawa ni myit ra ai lam hku sha re, ndau laika hpe n hkap la lu ai” nga nna KSDP Party ningbaw Dr. Manam Tu Ja tsun ai hpe chye lu ai.

“Ndai zawn ndau laika shapraw ai lam gaw shanhte byin shangun mayu ai hpe ka ai rai na re, shing nrai chye na shut ai majaw mung mai byin ai” nga nna Kachin mung masa party salang ni tsun ai.

“Ginra masha ni kawn hka madim masing hte seng nna moi majan n byin shi ai aten kaw nna ya aten du hkra lang hte lang ninghkap nga dingyang re raitim ya na zawn ndau laika shapraw ai lam gaw ginra masha ni hpe hpa nsawn ai lam re, Mali Nmai Zup Hka madim masing hte seng nna ginra masha ni uhpung uhpawng ni yawng myit hkrum let matut nna ninghkap sa wa ga” nga nna buga masha Saranum Nhkum Ja Hkawn tsun ai.

Mali Nmai Zup hka madim masing hpe galaw na matu yaw sing da ai gaw shaning ram ram na sai re, ndai masing hpe galaw na matu Miwa company ni gaw lai wa sai 2011-12 shaning hta KBC, RCM ni hku nna hka madim masing hpe myit hkrum sai, hpyen yen Mung shawa ni hpe mung ja gumpraw ni garum jaw sai nga nna ndau laika shapraw da lai wa sai re. January 11 ya shani hta mung Miwa sumtsan rung kawn kalang bai ndau laika shapraw da ai hte seng nna Mung shawa ni, wuhpung uhpawng ni yawng tsep kawp n hkap la lu ai lam tsun ai hpe chye lu ai.

Leave a Reply

Your email address will not be published.