Putao ginra bum lam hpe ginra P.T.Ts hpyen hpung ni hte Myen Hpyen Dap ni lam htu nga

Putao ginwang, Htang Ga lam hpe Myen Hpyen Dap hte Ginra P.T.TS hpyen hpung ni Back Hole mawdaw kaba ni hte lam baw ganaw nga ai lam chye lu ai.

“Ya htu ganaw nga ai lam gaw Htang Ga kaw na Shang Hka du wa sai, ndai zawn re galaw ai lam hpe Mung shawa ni gaw nra sharawng ai majaw Asuya hpang de laika bang ai lam ni mung nga lai wa sai raitim Mung shawa nsen hpe ahkyak nla ai sha htu dingyang re. Ndai zawn galaw ai lam gaw Mung shawa ni a akyu ara a matu ngu ai hta dai ginra de na n hprang sut rai htu shaw na masing gaw madung re majaw Mung shawa ni nra sharawng ai” nga nna buga masha langai tsun ai.

Mawdaw lam baw maden ai gaw  nhprang sut rai htu shaw masing re majaw Mung shawa ni dai masing hpe jahkring kau na matu ra sharawng nga ma ai  re, Asuya kaw na nan ahkang jaw da ai masing re majaw Mung shawa a tang shawn ai lam hpe ahkyak nla ya ai, mawdaw lam kaba baw yang gaw Myen Hpyen Dap kawn Hpyen Dap maden jat nna Mung shawa ni hkawm sa hkawm wa yak hkak wa  na hpe mung Ginra masha ni hkrit tsang nga ma ai re.

Putao Ginwang Laja Ga ginra hta gumhpraw nhprang hte Lungseng htu shaw na masing a majaw dai buga ginra de Myen Hpyen Dap hte P.T.TS ni pawnghpawm nna hkrun lam Baw maden wa ai re nga nna mung ginra masha ni tsun maram nga ma ai re.

Leave a Reply

Your email address will not be published.