Nbung Laru a majaw hpyen yen nta law law hten hkrum

Sinpraw ginwang ginjaw kata na hpyen yen dabang ni hta Frbruary 17 ya jahpawt nbung laru du shang wa ai majaw hpyen yen Mung shawa ni a dum nta law law hten hkrum mat ai lam na chye lu ai.

Pa Kahtawng hpyen yen dabang kaw htingagw 100 daram shanu nga ai dum nta hpri tsut ni hten hkrum mat ai re. Hten hkrum mat ai dum nta ni hpe bai gram lajang la na mat hpyen yen dabang up hte hpyen yen lakawn lanawn hpung ni, NGO hte KIO Asuya ni pawnghpawm nna lawan ai hku gram na matu lajang nga ai re nga nna Pa Kahtawng hpyen yen dabang na Salang kaba Doi San Awng tsun ai kaw na chye lu ai.

Hpyen yen Mung shawa ni a dum nta ni gaw dingsa wa sai re majaw nbung laru shang wa yang hten hkrum ai mat ai re. Hpyen yen nta ni hpe ngang ai hku gaw gap lu na matu garum masing ni mung nga ai raitim mayak amyu myu a majaw n lu hkrang shapraw lu shi ai re hte ya hten hkrum ai dum nta hta Kawa dingsa ni hpe nnan bai galai ai ladat hte gram sa wa na re lam dabang kaw lit nga ai salang langai tsun ai.

Nhkawng Pa hpyen yen dabang kaw mung nbung laru a majaw nta 10 grup yin hten hkrum mat ai rai nna Li Je hpyen yen dabang na dum nta ni mung hten hkrum mat ai lam hpyen yen mung masha langai tsun ai kaw na chye lu ai.

 

Leave a Reply

Your email address will not be published. Required fields are marked *