Laiza muklum kata aten lai lu sha hte pat hkum lu sha ni jep joi

Laiza Muklum kata nga ai gat seng shagu de Muklum Hkam Ja Dap hte muklum kata na Magam Dap Makan Dap ni pawnghpawm n htawm May 21 ya shani kaw nna Muklum kata gat seng ni hta aten lai lu sha hte hkum pat lu sha ni hpe jep rim zing ai lam galaw ai hpe chye lu ai.

Muklum kata aten lai lu sha jep ai lam hpe laning mi hta masum lang shaning shagu galaw nga ai rai nna muklum kata nga ai Mung shawa ni aten lai lu sha ni n sha hkrup hkra hte gat seng dut sha nga ai ni mung san seng ai lu sha hpe sha dut shabra ya na hpe yaw shada let galaw re lam Laiza Muklum Ningtau Hkamja Du Lane Lum Naw tsun ai.

Gat seng malu masha dut ai Kanu Kawa ni hpe mung hkum pat lu sha ni hpe ndut na matu lang hte lang tsun sadi jaw ai raitim naw dut ai lam ni nga ai rai nna lai wa sai ten hta hkum pat lu sha dut ai gat seng ni hpe gumhpraw dam gayet ai lam ni galaw lai wa sai raitim matut naw dut sha nga dingyang re majaw lit nga ai Muklum Uphkang rung hte Hkam Ja Dap ni kawn tara n hkan sa ai gat seng ni hpe seng dut ahkang du hkra pat kau na masing ni nga ai re.

Mung shawa ni hkam kaja na gaw shani shagu sha nga ai malu masha hta grai ahkyak ai re majaw gat seng dut nga ai Kanu Kawa ni mung dai ni dut n ma ai malu masha ni hpe hpawt ni bai dut ai lam n galaw na hte malu masha galaw dut ai ni mung gumhpraw jum lang nna lu sha bai galaw re ai hku nre sha gumhpraw jum lang ai hpang lata hpe atsawm sha bai gashin la na she malu masha lajang ai hku galaw yang grau Mung shawa hkam ja lam hpe madi shadaw lu na re lam hpaji jaw da ai lam ni nga ai re.

Leave a Reply

Your email address will not be published. Required fields are marked *