Nam Hkam Jaw (2) na hpyen yen Mung shawa ni mare buga de bai wa

Sam Mung Dingdung daw, Nam Hkam mare Jaw (1) ,Jaw (2) hpyen yen dabang kaw shanu nga ai Mankang, Hka Nan mare na hpyen yen Mung mare masha ni May shata kaw nna Mungmau ginwang Hkalup hpung ni woi awn n htawm mare buga de htinggaw 19 htawt wa magang sai lam chye lu ai.

Mankang mare gaw Manwing Myo mare kaba hte ni ai majaw shimlum lam nga na re ngu mu mada ai majaw Ginwang, Mare Salang, Dabang Up ni hte bawngban nna wa ai re, Ginwang hte Muse buga hpung ni ta gindun nna mare buga de htawt wa ai hting gaw (19) hpe nta gap ai ni hpe Kyats sen (15), nta gram na ni hpe Kyats sen (3) garum jaw ai re hte nta n lu mat ai htinggaw (6) hpe mung nta nnan gaw gap ya na re lam Salang Malang Dungla Kum Hpang tsun ai.

Majan a majaw mare buga hpe tawn kau ai na mat sai re majaw jawng ni hten za mat nna Ma ni a hpaji lam hpe myit tsang nga ma ai re hte ya ten jawngma Kanu Kawa ni gaw mare kaw nga nna jawngma ni gaw hpyen yen dabang kaw sha naw nga ra ai lam na chye lu ai.

Hpyen koi yen nga ai Mung mare masha law malawng yi sun hkauna, kan bau magam bungli galaw sha ra ai majaw tinang a mare buga de yawng ngu na ram htawt wa magang nga sai re.

Leave a Reply

Your email address will not be published. Required fields are marked *