Shingni Nbat Ramma Chyum Laika Sharin Hpawng galaw

Shingni nbat ramma chyum laika sharin hpawng hta Ramma ni a prat hpe gawgap sa wa ga ngu ai gabaw hte June.16 – Junly.6 ya laman Waimaw Mungna kaw galaw nga ai lam na chye lu ai.

Ndai sharin hpawng hta makam masham hpung n gring hka ai sha, ramma ni amyu a matu, mungdan a matu, karai sasana magam bungli ni hta kara hku shang lawm ra ai, shakut ra ai ngu ai lam ni hpe mungga hte gawde ya ai lam rai nna, ramma ni chye gring ai  shadu gachyawng hpaji, mawm sumli hpaji ni hpe mung sharin ya nga ai re hpe chye lu ai.

Hpyen yen dabang ni kaw na ramma ni a matu madung yaw shada galaw ai rai nna, myit daw hten nga ai ramma ni a prat hpe mungga hte bai gawgap  ya lu na matu, ramma ni chye gring chye ang ai hpaji ni hpe ra ai hta hkang nna galaw lu na matu yaw shada ai re lam, Ya na zawn Shingni nbat ramma chyum laika sharin hpawng galaw ai gaw shawng nnan lang re hte du na shaning hta mung galaw sa wa na rai nna tinang a kashu kasha ni hpe mungga hte gawde ya mayu ai rai yang Shingni nbat hte matut mahkai wa na lam, Shingni nbat ningbaw Sranum Lahpai Nang Pri tsun ai.

Ndai sharin hpawng hta Shait Yang, Masat Shadaw 8, Hpun Lum Yang, Je Yang, Myitkyina grup yin na hpyen yen dabang ni kaw na ramma marai 50 daram sa du shang lawm nga ai re hte makam masham nawku hpung shagu na ramma ni mung sa shang lawm ma ai re lam chye lu ai.

Shingni nbat gaw hpyen yen mung masha ni a hkum hkrang myit masin lam, wenyi lam, hpaji lam ni hta dang di dang dep ai daram madi shadaw garum nga ai re hte Shing ni nbat hpe 2012 ning Mar.1 ya shani hta hpaw hpang wa ai re hpe chye lu ai.

Leave a Reply

Your email address will not be published.