Zi-un hpyen yen dabang kaw na ma (2) mat nga

Zi un hpyen yen dabang kaw na asak 10 jan ning re ai Ma la kasha (2) mat ai laban bat mi jan du nga sai raitim ya aten du hkra tam sagawn nlu, hpa shiga mung nna rai nga ai lam Zi-un hpyen yen dabang komiti kaw na chye lu ai.

Mat ai ma yan gaw lai sai ten Ja Pu buga kaw nga ai Salang Lahkrau La Ring a kasha Shadang Doi Sut Awng (asak 16) ning hte lai sai ten Ga Ra Buga kaw nga ai Salang Lauwa Ze Hkawng a kasha Shadang Hkawng Dau (asak 15) ning yen rai nna ya hpyen yen aten Zi-un jawng kaw tsang (9) hpaji hpe sharin hkam la nga ai Ma yan re hpe dabang Ningtau Lithkam Saranum Sumlut Lu San tsun ai kaw na chye lu ai.

Ndai Ma yan gaw grai kanawn ai manang yan mung rai nna lai wa sai shata Jun (23) ya shani jawng sa ai kaw na jawng de mung ndu rai, lam lapran kaw mat mat ai re hpe chye lu ai.

Ma yan hpe lawan mu tam lu na matu Myitkyina Balik Dap kaw mung dabang komiti kawn garum hpyi ai hte tam sagawn nga ding yang rai nna mare lawk uphkang dap ni kaw na mung sagawn nga dingyang rai nga re.

Zi-un hpyen yen dabang masha ni hte Ma yan a dum nta masha ni gaw Ma yan hpe mu tam la lu na hpe myit tsang let myit mada ala nga ma ai re hpe dabang komiti ni shana wa ai kaw na chye lu ga ai.

Leave a Reply

Your email address will not be published. Required fields are marked *