Laiza de shang wa ai bu hkawm masha ni hpe Tuk Kwi ana jep ya nga ai hta ana kap masha nlawm shi

Munglai Hkyet shagyit kaw Laiza muklum kata de shang wa ai hkrun lam hkawm masha ni hpe August 1 ya jahpawt kaw nna tuk kwi ana jep ya nga ai hta August 5 ya shani du hkra rai yang ana rawng ai masha n lawm shi ai lam chye lu ai.

Laiza muklum Hkamja Rung kawn woi awn let Mung shawa ni a hkamja lam a matu Myitkyina lam de na Mawdaw, Cycle hte shang wa ai hkrunlam hkawm masha ni hpe hkum gahtet shadang shadawn ya nna gahtet shadang 38 lahta ni hte Tuk Kwi ana jep mu ai ni hpe tsi jaw sha na rai nna Laiza Mung Shawa Tsi Rung de tsi tsi hkam la shangun ai lam ni galaw sa wa na re lam Mung shawa hkamja lam matsun up Du kaba Labang Shing Rip tsun dan ai.

Munglai Hkyet shagyit kaw Tuk Kwi ana jep ai hta marai 2 gaw gahtet shadang tsaw ai raitim Tuk Kwi ana n rawng ai re hte August praw 1 kaw nna August 5 ya shani du hkra jep ai rai yang bu hkawm masha marai 300 jan hpe jep ya lu sai re hpe chye lu ai.

Hkali, Tuk kwi ana byin ai masha law wa ai masa hta hkan nna hkum gahtet shadang shadawn ya ai lam hpe August shata htum du hkra galaw sa wa na re hte lai wa sai 2017 shaning hta mung Tuk Kwi ana byin ai masha law wa ai majaw shagyit kaw hkrunlam hkawm masha ni hpe Hkali ana, Tuk Kwi ana jep ya ai lam ni galaw lai wa sai re hpe chye lu ai.

Leave a Reply

Your email address will not be published. Required fields are marked *