Ndup Yang hpyen yen Jawng kaw jawng ma ni Jawng bai lu lung nga sai

Hka Hku Mung ginra Ndup Yang hpyen yen dabang kaw July shata laman Tuk Kwi ana a majaw Jawngma ni machyi ai law nna Jawng hpe pat da ra ai madang du mat ai re hta August 5 ya shani kaw nna Jawng laika ni hpe atsawm sha bai lu sharin nga sai lam ginra masha ni shana wa ai kaw na chye lu ai.

Ndup Yang hpyen yen dabang kaw Jawngma marai 152 nga ai hta marai 50 jan gaw Tuk Kwi machyi mat ai majaw jawng ni n lu hpaw mat ai re. Tuk Kwi machyi ai Jawngma ni hpe Garum Ningtum Uhpung Uhpawng ni, Yangon KBC kaw na Sarawun Hpauyam Hka Htung hte Tsi Sara Saranum ni marai 11, Shanglawt Asuya kaw nna Tsi Sarawun marai lahkawng, Tsi Sara langai ni kawn tsi tsi gawn lajang ya ai lam galaw ai majaw Ma ni law malawng mai tsai wa ai re hte Jawng hpe atsawm sha bai  hpaw sharin lu ai re lam Ndup Yang Hpyen Yen Jawng Up Sara kaba Saka Brang Nan tsun ai.

Jawngma ni a hkam ja lam a majaw Jawng ni hpe aten na na pat da nna jawng laika sharin ai lam hta ngut na daram n ngut, hpang hkrat ai lam gaw nga ai ratim Jawng kaw nna Jawngma ni a laika sharin ai lam hte seng nna shana daw hta aten shajan la nna n hpang hkrat hkra sharin sa wa na lam ni mung nga ai re. Ndup Yang  hpyen yen Jawng gaw Salang Yang hpyen yen hkan na hpyen yen Jawngma ni lung nga ai Lapran Tsang Jawng langai re hpe mung chye lu ai.

Leave a Reply

Your email address will not be published. Required fields are marked *