Myitkyina kaw manu jahpu n la ai sha Hkali ana, Tuk Kwi ana ni hpe tsi gawn lajang ya nga

Myitkyina na သီတဂူ tsi rung kaba kaw manu jahpu n la ai sha ကခ်င္ျပည္နယ္အခမဲ့ေဆးဝါးကုသေရးေဖာင္ေဒးရွင္း kawn August 5 ya shani kaw nna August 8 ya shani du hkra Hkali ana, Tuk Kwi ana ni hpe tsi gawn lajang ya nga ai lam na chye lu ai.

Yi nam aten byin law ai Hkali ana, Tuk Kwi ana, Kan mase ai, Hpyi Hkrawn ana zawn re ana byin hkrum nga ai machyi masha ni hpe madung tawn nna manu jahpu n la ai sha tsi gawn lajang ya ai re hte ana grai sawng mat nna Ja gumhpraw nlu yakhkak hkrum nga ai machyi masha ni hpe mung Yangon, Mandalay mare kaba de ကခ်င္ျပည္နယ္အခမဲ့ေဆးဝါးကုသေရးေဖာင္ေဒးရွင္း kawn ja gumhpraw lit la ya nna tsi gawn lajang ya na re hpe chye lu ai.

ကခ်င္ျပည္နယ္အခမဲ့ေဆးဝါးကုသေရးေဖာင္ေဒးရွင္း uhpung hpe lai wa sai 2016 shaning kawn hpaw ninghtan da ai rai nna Jinghpaw Mung kata na hpyen yen dabang ni hte tsi Sara Wun ni n du lu ai shara na mare kahtawng ginra ni de madung dat nna shaning shagu tsi tsi ya ai magam bungli hpe galaw nga ai uhpung re hpe mung chye lu ai.

Ya aten Myo mare kaba shara shagu hta Hkali, Tuk Kwi ana ni grai kap bra nga ai majaw Wunpawng Mungdan Shang Lawt Asuya KIO uphkang ginra kata na Mung shawa hkamja lam hpe tau nau makawp maga ai lu na matu Laiza de shang wa ai bu hkawm masha ni hpe Muklum hkamja rung kawn woi awn let Hkali ana, Tuk Kwi ana ni jep ya nga ai re.

Photo credit; EPN

Leave a Reply

Your email address will not be published. Required fields are marked *