Share Shagan Masat Ninghtoi hpawng lamang galaw

Wunpawng Mungdan hte Myu sha ni lawt lu na matu asak ap nawng lai wa sai Myu tsaw Mung tsaw Share Shagan ni yawng hpe myit dum let shagrau sha-a ai Share Shagan Masat Nhtoi lamang hpe August 10 ya jahpawt hkying 9:00 Am hta Laiza muklum Padang Hkrun Lam Majan masing woi awn rung gawknu kaw galaw ai lam chye lu ai.

Share Shagan Masat Nhtoi mungga hpe Wunpawng Mungdan Shanglawt Hpung Ginjaw Komiti Tingnyang Up, Wunpawng Mungdan Shanglawt Kongsi Ningbaw Kaba Du Daju Jum Nban La kaw nna mungga jaw ya ai re hpe chye lu ai.

Ningbaw Kaba GOC Zau Seng nnga mat wa ai nhtoi August 10 ya shani hpe la nna Myu hte Mungdan a matu asak ap nawng mat wa sai share shagan ni yawng hpe shakawn ai, Aw law ai, masat masa galaw ai lam re. Share Shagan Masat Nhtoi hpe n kau gaw yawn hkyen nhtoi ngu myit la ai ni nga ai, Share Shagan Masat Nhtoi gaw Myu hte Mungdan a matu asak ap nawng mat wa sai Share Shagan ni yawng hpe shakawn ai, Aw law ai, masat masa galaw ai lam re. yawn hkyen nga ai nhtoi n re nga nna Share Shagan Masat Nhtoi lamang hte seng ai lam hpe Wunpawng Mungdan Shanglawt Hpung Ginjaw Komiti Tingnyang Up Du Daju Jum Nban La kawn du sa ai Mung shawa ni hpe tsun dan ai.

KIO ginjaw Komiti Ninggawn Amu Madu Sara Kaba Kumhtat Hting Nan kawn mung Wunpawng Mungdan Shanglawt Hpung Ginjaw Komiti Tingnyang Up a Share Shagan Masat Nhtoi mungga hpe la kap nna dai ni na ten prat madang hta hkan nna Media gaw grai n-gun ja wa ai majaw Mungkan de shiga shabra ya ai lam, gin len ya ai lam ni lu wa ai. Rawt malan nga ai amyu sha ni hku nna mung Media hpe jai lang ai hta akyu kaja hku na jai lang lu hkra shakut ra ai, n jaw n teng ai hku nna shiga hpe shabra dat ai majaw hpyen wa hpe akyu jaw ai, n-gun tai ya ai lam ni byin wa chye ai re. Social Media hpe madung tawn ai ni hkrai rai nga ai hte maren tinang amyu sha lawt lu lam magam bungli hta bawnu machye machyang hte maram dinglik nna Media hpe akyu ja shawn jai lang sa wa ga nga nna n-gun jaw shatsam mungga jaw ya ai.

Share Shagan Masat Nhtoi hpawng lamang hta Ningbaw Kaba hte Ginjaw Komiti Salang ni, Magam gun kaji kaba hte Wunpawng amyu sha ni yawng a matu Engligan Nawku hpung na Rev. Sai La Rip kawn akyu hpyi ya ai rai nna asak apnawng mat wa sai share shagan ni a matu Hkahtawlik nawku hpung na Sara kaba Lasang Tu San kawn akyu hpyi ya ai rai nna  Laiza buga hkalup hpung Rev. Lahpai Shing Rip kawn Wunpawng amyu sha ni yawng a matu mara raw akyu hpyi ya ai re.

2019 shaning na Share Shagan Masat Nhtoi hpe Wunpawng amyu sha ni shanu nga ai buga shara shagu hta galaw ai rai nna KIO Ginwang Ginjaw shagu, KIA Dap Ba Dap Dung shagu hte Wunpawng amyu sha ni chyam bra shanu nga ai Maigan Mungdan ni hkan mung galaw ai lam chye lu ai.

Laiza muklum kaw galaw ai hpawng lamang hta Mung shawa, Dap shawa, Jawngma hte ramma ni marai 1700 daram sa du shanglawm ai lam chye lu ai.

Leave a Reply

Your email address will not be published. Required fields are marked *