Gasat Gala Majan Matut Manoi Byin Ai Majaw Mung Shawa Ni Mayak Hkrum Nga

Lahta Sam mung Kut Hkai Ginwang, Maw Han, Ta Mung Nye mare makau mayan ni hta August shata praw kaw nna gasat gala majan ni matut manoi byin ai majaw dai ginra na hpaji jawng ni pat da ra ai hte buga masha ni hkawm sa hkawm wa mayak hkrum nga ai lam na chye lu ai.

Mare shinggan hta gasat poi byin ai raitim, Myen Hpyen Dap kaw na gap dat ai laknak kaba hkyep ni mare kata kaw wa hkrat ai re hte, August (11) ya shani hta mung Maw Han, Ta Mung Nye mare makau mayan Myen Hpyen Dap hte TNLA ni gasat gala majan byin nna tsang (10) jawng ma Shd. Hkawng Lum hpe laknak kaba hkyep wa hkra ai majaw tsi tsi hkam la nga ai lam buga masha langai tsun ai kaw na chye lu ai.

Dai ginra ni hta gasat gala majan matut manoi byin ai majaw buga masha ni hkawm sa hkawm wa yak hkak hkrum nga ai sha n ga, mare hkan na la sha ni hpe Myen Hpyen Dap kawn san jep ai lam ni mung nga ai re hte Maw Han hpaji jawng ni hta Myen Hpyen Dap kawn shara jahkrat nga ai majaw jawng pat tawn da ra ai hta sha n ga ma ni a hpaji lam ahtu hkra machyi shangun nga ai.

Dum nta htinggaw (500) daram shanu nga ai Maw Han mare hta Jinghpaw, Sam, Miwa amyu sha ni law malawng shanu nga ai rai nna, ya a ten gasat gala majan ni byin nga ai majaw buga masha ni hkawm sa hkawm wa yak hkak ai hte kan bau bungli galaw lu galaw sha na matu mung mayak ni nga taw ai re lam na chye lu ai.

Aug.12 ya shani hta mung magam Jinghku hpung 3 rai nga ai TNLA, MNDAA, AA ni kaw nna Myen mung dingdung daw hte Rahkai mung ginra ni hta Myen hpyen dap a htu shadut majan baw nga ai lam ni hpe lawan shazim ya na matu hpyi shawn da ai re hpe mung chye lu ai.

Leave a Reply

Your email address will not be published. Required fields are marked *