Gumchying Gumsa Uphkang Lailen

Credit; Lahpyaw Hkawng Ze

Laiwa sai ten ladaw hta, anhte Wunpawng amyu sha ni mung Gumchying Gumsa Uphkang lailen masa hte uphkang sha lai wa sai rai nga ai. Gumchying Gumsa ngu ai gaw, awmdawm ahkaw ahkang hpe tinang hkrai tek jum manat ai uphkang lailen rai nga ai. Ndai Gumchying Gumsa Uphkang lailen a ningpawt hpe tsun ga nga yang, ” Nga Shaga” hpe sat sha nna ” Wahtam shang” ai npawt kaw na byin pru wa ai lam rai nga ai.

Wahtam shang ai lam gaw, ginru ginsa Nga Shaga a ladaw langai hpe shadik shatup ai lam rai nga ai. Dai Nga Shaga hpe sat sha ai shani kaw nna, shinggyim masha ni ” Ji-nat ” hpe myi hte n mu lu mat sai. Nga Shaga hpe sat sha ai shaloi di dam kaba kaw tawk azat bang na shadu sha ma ai da! Shadu ai shaloi, nga ladi hte salum wunju mung shadu shalawm ma ai. Shadu shalawm ai nga ladi hte salum hpe mahkai shaw na matu, chyinghkyi langai mung galaw tawn ma ai da: dai nga ladi hte salum wunju hpe lu mahkai shaw lu ai wa gaw, yawng a du magam tai nna, kawn ( snr ) kang – အခြန္​ hpe hta sha lu u ga ngu na jawm myit hkrum tawn ma ai.

Dai zawn myit hkrun tawn sai hte maren, ” Du ahkang sharawt,magam satang manawt, Du ningpawt lata, Magam hpu-awn ginhka ” ai hku na amyu lakung shagu de na kahpu kanau ni yawng hpe shaga nna, langai hpang langai mahkai shaw ai shaloi, Dureng Hkawp Pungwa ngu ai Dureng La wa gaw, ladi hte salum lawm ai wunju hpe lu mahkai shaw la nu ai. Dai shani kaw nna, Dureng Hkawp Pungwa gaw shi a nta kaw kawn chyinghkyi noi nna, kawn ( snr ) kang-အခြန္​ hta sha hpang wa sai. Shi kang hta sha hpang wa ai shani kaw nna, Gumchying Gumsa Uphkang Lailen ningpawt hpang wa sai.

Kawn ( snr ) kang – အခြန္​ chyinghkyi noi da ai shani kaw nna, shawa masha kadai mi rai rai nga sat sha shagu nga magyi noi da ya ra ai. Shan lu shagu magyi langai langai ding yang noi da ya ra ai. Lamu ga yu tim, shara tsawm htuk manu ai shara ni gaw, Du magam wa shawng lata la kau ai. Yi yu, yi hkyen, yi nat, mam ting tim Du magam wa hpe shawng galaw ya ngut ai hpang she, kaga masha ni mai galaw la ai. Sut hpaga, Ja hpaga awng tim Du wa hpe shawng gun jaw ra ai. Kawn Duwa hku na ahkang n jaw yang, kaga masha ni manau dum ai lam n mai galaw ai hku na, pat hkun tawn ma ai.

Gumchying Gumsa prat hta, masha madang hpe hpan ( 3 ) hku na garan tawn da ma ai. Du magam amyu, Darat Daroi amyu, Mayam amyu ngu na ginhka tawn ma ai. Numwawn num la ai lam hta mung, Du magam amyu shada sha la hkat ma ai. Du magam amyu n re ai num la jang, Du magam sari sadang yawm mat ai nga na tsun ma ai. Du magam ni a lamu ga kaw nga lawm ai mare masha ni hpe uphkang lit la ya ma ai. Du magam ni a ” Zaw ” hku shatai tawn ma ai. Hpyen majan byin jang, majan gasat lawm ra ai. Aten shagu myit maja na nga ya ra ai.

Dai zawn re amyu shada adip arip, dip up sai chyup sha hkat ai Gumchying Gumsa Lai masa hpe kadai mung n ra sharawng ai majaw, yawng gumlau wa nna, Gumchying Gumsa Uphkang masa lailen hpe 1964 ning, Mungbe Zuphpawng ( Mungbe Conference ) hta tara shang dawm kau ai lam ni galaw lai wa sai.

 

Amyu sha magam hta,

Lapyaw Hkawng Ze

Wunpawng Salum. (L.Z)

Leave a Reply

Your email address will not be published. Required fields are marked *