Lambraw Yang Garum Gahtau Hpung ni hku nna machyi makaw hkrum nna tsi rung de sa na matu yak hkak nga ni hpe garum shingtau ya nga

Lam amyu myu a majaw machyi makaw hkrum nna tsi rung tsi gawk de lawan ladan nlu sa, Sa sa masha n nga, Jawn hpa n lu re ai wunpawng amyu sha ni hpe Lambraw Yang Garum Gahtau Hpung ni kawn lit la nhtawm htaw wa htaw sa lam ni hta garum shingtau nga ai lam na chye lu ai.

Garum ningtum lam hte seng nna kaga amyu ni hta uhpung uhhpawng law law nga ai, Wunpawng amyu sha ni hta garum ningtum hpung hpaw nna garum shingtau hkat ai lam hta grai naw gawng kya nga ai hpe mu mada ai. Lai wa sai ten Lambraw Yang garum ningtum hpung n hpaw ai ten hkan machyi masha htaw wa htaw sa lam hta kaga garum ningtum hpung ni hpe hkrai garum hpyi ra ai re majaw garum nitum hpung gaw hpaw ra sai ngu ai myit hte Lambraw Yang garum ningtum hpung hpe hpaw wa ai re lam Lambraw Yang Garum Gahtau Hpung Ningbaw Salang La Mai La Sam tsun dan ai.

Lambraw Yang Garum Gahtau Hpung ni hpe gara shara kaw na mi ratim matut mahkai garum hpyi mai ai rai nna saw shaga ai shara shagu de garum nga ai lam chye lu ai. Machyi masha ni hpe mawdaw hte htaw wa htaw sa galaw ai hku sha garum nga ai re hte du na aten hta gaw Ja gumhpraw hku mung garum shingtau lu hkra shakut sa wa na re hpe mung chye lu ai.

Lanam aten ladaw Tuk Kwi ana machyi nna ai masha law law hpe mung tsi rung tsi gawk ni de aten dep sa ai lam, Tuk Kwi ana hpe makawp maga na matu Lambraw Yang mare hkan Jigrawng tsi gat ai lam ni hpe mung woi galaw nga ai re hpe Lambraw Yang Garum Gahtau Hpung kaw na chye lu ai.

photo credit; LBY Grkht

Leave a Reply

Your email address will not be published. Required fields are marked *