Hpakant kaw Ganghkau kaw na hpa re nchye ai hpri adaw achyen di hkrat wa

Hpakant Lawng Hkang, Maw Pung mare kaw September 19 ya shani hking 1:00 chyen daram hta Ganghkau ntsa de na hpa re n chye lu shi ai hpri adaw achyen rai langai hkrat wa ai lam buga masha ni shana wa ai kaw na chye lu ai.

Wa hkrat ang ai shara gaw Maw Pung na Rahkai amyu sha Salang Hla Kyaw a nta wang hka shin ginsum makau kaw rai nna nta masha ni hkala nba hkrum ai lam gaw n nga ai. Hka shin ginsum gaw hten hkrum mat ai re hpe chye lu ai. Dai Ganghkang ntsa na hpri adaw achyen hkrat wa ai aten ganghkau kaw (10) lang daram ngoi kapaw nna hkrat wa ai re nga nna Lawng Hkang na buga masha ni tsun ai .

Hkrat wa ai hpri daw chyen gaw dam de Pepa Pung hta loi shawn Pe 5 daram nga nna, galu de Pe 15-18 daram re lam dai shara kaw sa du yu ai buga Salang langai tsun ai.

Dai hpri arai hkrat kapaw ai nsen gaw Hpakant ginra ting hta na lu ai majaw nkau gaw majan byin wa sai shadu nna grai hkrit kahpra ai lam mung nga ai re hte dai hpri daw chyen gaw hpa baw arung arai re ngu ai hpe seng ang ai ni naw matut sagawn nga ai rai nna dai shara hta Myen hpyen la ni mung sa du ma ai re lam Buga masha ni shana wa ai.

Hpakant ginra kaw Lai wa sai 2016 shaning hta mung Ganghkau ntsa kaw na ndai zawn re ai Hpri daw chyen hkrat lai wa sai rai tim Myen Hpyen Dap ni yawng wa hta la kau nna ya ten du hkra hpa re ngu ai hpe Mung shawa ni de tsun sang lang dan ai lam n nga ai re hpe mung chye lu ai.

Leave a Reply

Your email address will not be published. Required fields are marked *