Sumpra Bum na Saranum yan hpe gayet da ai Myen La lahkawng hpe aming jahkrat

Sumpraw Bum na Jawng Saranum yan hpe gayet da ai Myen La lahkawng hpe September 13 ya shani Sumpra Bum Tara Rung kaw na marai langai hpe htawng dam shata kru, marai langai hpe gaw htawng dam shata mi jahkrat kau da sai lam na chye lu ai.

Ndai manghkang hparan na lam hte seng nna Tara Rung lung n htoi hpe September 19 ya ngu masat da ai raitim Ga baw amyu myu shadut nna September 16 ya shani de htawt sit ai raitim dai n htoi hta mung n galaw ai sha September 13 ya shani nan Saranum yan hpe Jawng gawk kaw nna sa shaga la nhtawm atik anang tara rung shangut na matu galaw ai re nga nna dai ginra na mying n shadawng ai Salang langai tsun dan ai.

Tsun da ai nhtoi hta n galaw ai shanhte myit ra ai hku amu hpe ahpa atang jahkrat ai hpe yu yang ginra masha ni hpe hpa n nawn ai hte bung ai, Saranum yan hpe gayet ai U Soe Lwi Oo hpe gaw htawng dam shata kru, hkan nang ai Tan Htaik Aung hpe gaw htawng dam shata mi jahkrat ai rai nna ndai manghkang hpe ja ja ahkyak la ai lam n galaw ai hpe yu yang Asuya a Tara Upadi hpe n mai kam ai madang du nga sai ngai nna mung dai Salang wa matut tsun dan ai.

Ndai manghkang gaw Saranum yan hpe lai wa sai August 17 ya shani Nam de shat mai tam sa ai shaloi Sumpra Bum ginra de Phone sumri lup hkawm ai Myen La 2 kawn hpang kaw nna adup gayet majaw byin wa re hpe mung chye lu ai.

Leave a Reply

Your email address will not be published. Required fields are marked *