Uru Mission School jawng yu hpawng galaw

Uru Seng Maw Ginwang a sasana jawng (Uru Mission School) jawng yu hpawng lamang hpe September 23 ya shani Uru Seng Maw Sasana wang, Zup Ra mare kaw galaw ai lam na chye lu ai.

Jawng hta Myo mare kaba hkan na Sara kaba ni hpe shaga la nna June-September, shata 4 tup sharin ya ai re hte Sasana jawng ngut sai jawng ma ni hpe buga hpung kata na magam gun npu kaw sasana bungli galaw lu na matu yaw shada ai re hpe chye lu ai. Nawku hpung masha ni yawng tinang a buga kata hta sasana galaw let sakse hkam lu na matu, Chyum jawng yu sai sara hpe hkrai sasana magam bungli nawng ya ai rai yang anhte a buga hta sasana bungli galoi mung galaw byin nan re, dai majaw tinang nan hkaw tsun lu hkra sharin ya ai re lam Rev. Nhkum Seng Hkum tsun ai kaw na chye lu ai.

Ndai sasana jawng hta sa lung mayu ai ni gaw yawm htum tsang 8 lung yu sai ni rai ra na hte laika chye hti chye ka ai masha ni ra ai. Asak 18 ning a lahta na hpung masha ni hpe sha hkap la na rai nhtawm ndai jawng hpe laning mi hta kalang hpaw sa wa re hte Yinam ta laman sharin ya ai re hpe chye lu ai.

Jawng hpaw ai gaw ndai kalang gaw NO. (1) lang hpaw sharin ai rai nna jawngma marai 16 jawng ngut la lu sai re hpe mung chye lu ai.

Leave a Reply

Your email address will not be published. Required fields are marked *